Олунньу 7 күнүгэр биһиэхэ, Дьокуускай куоратын 17 нүөмэрдээх орто оскуолатыгар, «Байанай алгыһа» диэн уолаттарга аналлаах күрэх ыытылынна.
Барыта 6 түһүмэхтэн турбута: алгыс этии, айылҕаҕа аналлаах саха таабырыннарын таайыы, собо балыгы ыраастааһын уонна үөстээһин, “Байанай бэлэҕэ” диэн булт аһыттан сандалы биир сүрүн бүлүүдэтин презентациялааһын, саанан ытыы, “хомуур күрэҕэ” диэн бириэмэҕэ элбэх куубуктары хомуйуу. Ону таһынан, быйыл Аҕалар сүбэлэрэ кыттыһан, уолаттарга анаан ох саанан маастар кылаас тэриллибит. Биһиги кылааспыт быйыл бу күрэххэ саҥа кытынна. Уолаттарбыт V «В» кылаастар иккис миэстэни ыллылар. Эһиил өссө күүскэ бэлэмнэниэх буоллулар. Биһиги уолаттар булка-алка сыһыаннаах албастары, ньымалары билэ үөрэммиттэрин сэҥээрбиппит, сөбүлээн көрбүппүт.
Кыттааччылар, биһиги санаабытыгар, саанан ыппыттарын ордордулар. Бу күрэхтэһиини оҕолор да, төрөппүттэрда олус сэргээтилэр. Бары астынан тарҕастылар. Онон, уолаттарга этиэхпит этэ, маннык күрэхтэргэ өссө көхтөөхтүк кыттан иһиҥ.
София ХАРЛАМПИЕВА, Валерия КУСАТОВА
Дьокуускай 17 № орто оскуолатын V “В” кылааһын үөрэнээччилэрэ, «Сайдын» медиа киин эдэр корреспонденнара
keskil14.ru