Сэтинньи 25 күнүгэр биһиги оскуолабытыгар саха норуотун киэн туттуута, ЮНЕСКО баай нэһилиэстибэтин шедеврэ буолбут — Олоҥхо күнүн бэлиэтээтибит!
Сарсыардаттан киирии ааҥҥа, 8-с кылаас оҕолоро учууталларбытын, үөрэнээччилэрбитин алгыстаах алаадьынан көрүстүлэр, алгыс тылларын анаатылар. Бу курдук үтүө үгэһи салгыы тутуһуохпут диэн эрэнэбит!
Оскуолабытыгар Олоҥхо тыына күүһүрэн, үөрүүлээх линейкэҕэ Олоҥхо туһунан саҥа билиини, сонун чахчылары иһиттибит, алын кылаас үөрэнээччилэрэ оһуохайы оройуттан тутаннар, улахан кылаастар «Тоҕус мэҥэ хамсаныы» оҥорон, 7 кылаастар биир дойдулаахпыт Савелий Тимофеев олоҥхотуттан быҺа тардан ааҕан, тэрээһиҥҥэ сэргэхсийиини биэрдэ.
Кылаас чаастарыгар «Олоҥхо алыптаах эйгэтэ» диэн олус интэриэһинэй, дириҥ ис хоһоонноох теманы таарыйдыбыт, учууталларбыт тематическай уруоктары ыыттылар.
Оскуола иһинэн тэриллибит «Күн» оҕо түмсүүтэ 5-8 кылаас үөрэнээччилэригэр аналлаах «Олоҥхо дойдутугар айан» диэн квест-оонньуу тэрийэн ыыттылар. Оҕолорбут умнуллубаттык сынньанан, Олоҥхо геройдарын кытта билсэн, холобур, Ньургун Боотурдуу бэргэн ытааччы курдук киирсэн, Туйаарыма Куо курдук сэмэйдик олоҥхолоон, араас таабырыннары таайан, сорудахтары толорон, кыайыылаахтар үөрүү өрөгөйүн биллилэр.
5-10 кылаас үөрэнээччилэрэ улуустааҕы Олоҥхо олимпиадатыгар билиилэрин тургутан көрдүлэр.
Маны таһынан нэдиэлэ устата дьикти чараас эйгэни үөскэтэн, «Олоҥхо дойдута оҕо хараҕынан» диэн уруһуй күрэҕэ ыытыллыаҕа. Күрэхпит сыала — оҕолор Олоҥхону хайдах саныылларын, уйулҕаларыгар хайдах иҥэн сылдьарын көрдөрүү буолар.
Тэрээһин былаанын барытын ситиһэн, үрдүк таһымҥа ыыттыбыт дии саныыбыт! Оскуолабыт сыл устата олоҥхобут үйэлэргэ аатын ааттата, сураҕын сураҕырдара үлэлиир сыалбытын ситиһэргэ дьулуурдаахтык үлэлиэҕэ диэн эрэнэбит!
Сайаана Терехова,11 кылаас
«Дьоҕур» медиакиин, Кэбээйи орто оскуолата