Алтынньы 24 күнүгэр оскуолабытыгар үөрүүлээх күн тосхойдо! Маҥнайгы кылаас үөрэнээччилэрэ «Орлята России» — «Өксөкү сиэннэрэ» кэккэтигэр киирэн чиэстэннилэр!
Үөрүүлээх чааспыт Арассыыйа, Саха сирин, Чурапчы улууһун былаахтара киириититтэн уонна өрөгөй ырыаларыттан саҕаланна. Ол кэннэ эҕэрдэ, алгыс тылларын тиэртилэр оскуолабыт дириэктэрэ Михаил Спиридонович Игнатьев, дириэктэри иитэр үлэҕэ солбуйааччыта Агафья Афанасьевна Седалищева уонна ыҥырыылаах ыалдьыппыт Чурапчы улууһун «Оҕо саас сирдьиттэрэ» муниципиальнай координатора Евгения Ивановна Горохова.
Бу эппиэтинэстээх күҥҥэ оҕолорбут, кылаас салайааччылара бары кып-кыраһыабайдара, кэп-кэрэлэрэ. Оҕолорбут «Өксөкү сиэннэрэ» түмсүү кэккэтигэр киирбиттэрин мэктиэлиир хаалтыстарын кэтэннэр олуһун диэн астыннылар, долгуйдулар. Андаҕар тылларын доргуччу эттилэр.
«Сулус» оҕо хамсааһынын иитиллээчилэрэ кырачаан хотойчооннорбутугар эҕэрдэ үнкүүлэрин бэлэхтээтилэр. Ону тэҥэ оскуолабыт хас биирдии кылааска минньигэс бэлэх – торт уунна. Оҕолор олуһун диэн үөрдүлэр, дьоллоннулар. Тэрээһиммит кылааһынан уопсай хаартыска түһээһининэн түмүктэннэ.
Оҕолорбут куруутун инники күөҥҥэ сырыттыннар, дойдуларыгар бэриниилээх хотойдор буола улааттыннар!
Сивцева Кэскилээнэ, X кылаас үөрэнээччитэ,
С.А.Новгородов аатынан Чурапчы орто оскуолата