Ахсынньы 8 күнүгэр В.П. Ларионов аатынан Майа орто оскуолатыгар дойдубут «Биир Ньыгыл Арассыыйа» партиятын көҕүлээһининэн «Дьоруой партата» арыллыыта буолан ааста. «Дьоруой партата» үөрэхтээһин бырайыак 2018 сылтан олоххо киирбитэ. Ол чэрчитинэн Аҕа дойдубут дьоруойдарын күнүгэр анаан Дьоруой партатын арыйыыга муһуннубут. Үөрэнээччилэр остуолларыгар Дьоруой хаартыската, кини олоҕун чахчылара уонна хорсун быһыыларын туһунан иһитиннэрии түмүлүннэ.
Бырайыак сыала-соруга — үөрэнээччилэргэ биир дойдулаахтарын-Дьоруойдарын килбиэннээх, тус хорсун быһыыларын санатыы, кинилэр сырдык ааттарын үйэтитии.
Бу «Дьоруой партата» биһиги оскуолабыт выпускниктарыгар Павел Романович Матчитовка уонна Дмитрий Семенович Кривошапкиҥҥа ананна.
Павел Романович Матчитов. Позывнойа — Матчит. Дьокуускайга атырдьах ыйын 10 күнүгэр 1985 сыллаахха төрөөбүтэ. Павел оҕо сааһа Майа сэлиэнньэтигэр ааспыта. Оскуола сылларыгар Павел бэйэтин көхтөөх, сыаллаах-соруктаах киһи быһыытынан көрдөрбүтэ: кини спордунан үлүһүйэрэ, байыаннай-патриотическай кулуупка дьарыктанара. 2003 с. Дьокуускайдааҕы тыа хаһаайыстыбатын техникумугар юрист үөрэҕэр киирбитэ. Үөрэҕин бутэрээт, Павел үлэтин Покровскай куорат ис дьыала уорганнарыгар саҕалаабыта. Көхтөөх, сайдыыга дьулуурдаах киһи буолан, үлэтин кытта сэргэ кинолог уонна сурдопереводчик идэлэрин баһылаабыта. Хаҥалас, Нам уонна Муома улуустарын ис орган отделылларыгар участковай быһыытынан үлэлээбитэ. 2021 сыллаахха Павел пенсияҕа тахсыбыта. Пенсияҕа тахсан сөбүлүүр дьыалатынан дьарыктаммыта: бултаан-алтаан, айылҕаны кытта алтыһан, төрөөбүт дойдутун кытта биир санааны булан ылара. 2023 сыллаахха «Боотур» добровольческай этэрээккэ киирбитэ, байыаннай бэлэмнэниини ааспыта уонна кулун тутар 9 күнүгэр 2023 с. Украина сиригэр анал байыаннай дьайыыга кыттарга контракт түһэрсибитэ. Младшай лейтенант, стрелок (снайпер) этэ. Көрдөрбүт хорсун быһыытын иһин «Хорсунун Иһин» мэтээлинэн наҕараадаламмыта. Дойдубут президенэ В.В Путин ыйааҕынан 2024 сыллаахха тохсунньу ый 18 күнүгэр анал байыаннай дьайыы толоонугар, тыынын толук ууран күн сириттэн күрэммитин кэннэ «Хорсун быһыы» уордьанынан наҕараадаламмыта.
Дмитрий Семенович Кривошапкин. Позывнойа — Крив. Гвардия ефрейтора. Алтынньы ый 12 күнүгэр 1994 сыл Дьанхаады нэһилиэгэр күн сирин көрбүтэ. Дима 2002 сыллаахха Майа алын сүһүөхтээх оскуолатыгар маҥнайгы кылааска үөрэнэ киирбитэ. 2005 сыллаахха Майа В.П Ларионов аатынан оскуолаҕа 5-с кылааска үктэммитэ. Дима оскуолаҕа туйгуннук үөрэммитэ, спорт араас көрүҥүгэр дьаныардаахтык дьарыктаммыта, улуус, өрөспүүбүлүкэ таһымнаах күрэхтэһиилэргэ миэстэлэспитэ, ону таһынан, улууска, өрөспүүбүлүкэҕэ буолар олимпиадаларга ситиһиилээхтик кыттара. 2013 сыллаахха оскуоланы бутэрэн, Чурапчытааҕы Аграрнай-Техническэй колледжка баһаарынай идэтигэр үөрэнэ киирбитэ. Үөрэҕин кэннэ УФСИНҥа младший опер уполномоченнайынан үлэлээбитэ. 2022 с. алтынньы 14 күнүгэр мобилизациянан ынырыллан, анал байыаннай дьайыыга барбыта. Дойдубут президенэ В.В Путин ыйааҕынан 2024 сыллаахха бэс ыйын ый 11 күнүгэр анал байыаннай дьайыы толоонугар, тыынын толук ууран күн сириттэн күрэммитин кэннэ «Хорсун быһыы» уордьанынан наҕараадаламмыта.
Павел Романович уонна Дмитрий Семенович төрөөбүт дойдуларыгар тапталлара, бэриниилэрэ үүнээр көлүөнэ ыччакка бастыҥ холобур буолар.
Хорсун Быһыы хаһан да умнуллубат,
Норуот өйүгэр өрүүтүн баар.
Хорсун быһыы туһунан хоһоон суруллар.
Албан аат туһунан ырыа ылланар.
Суруйда: Лида Кириллина, Лилиана Слепцова, Гирьяна Павлова,
Ыыттылар: Лида Кириллина, Гирьяна Павлова,
Оператор, монтажер: Лилиана Слепцова,
X «б» кылаас үөрэнээччилэрэ,
“Мэҥэбил” медиакиин эдэр кэрэспэдьиэннэрэ