2025 сыл Арассыыйаҕа Аҕа дойдуну көмүскээччи, Саха сиригэр Ийэ дойдуну көмүскээччи, Одунубутугар Дойдуга бэриниилээх буолуу сыллара биллэрилиннэ. Ол чэрчитинэн сылы быһа араас тэрээһиннэр, акциялар уо.д.а былааннаналлар. Биһиги оскуолабыт түмэлигэр Аҕа дойдуну көмүскээччи күнүн көрсө сонун быыстапка туран үөрэнээччилэр болҕомтолорун тарта.
Ол курдук, аармыйа кэккэтигэр сулууспалаабыт, ытык иэстэрин төлөөбүт эр дьоннорбут кэтэ сылдьыбыт байыаннай таҥастара, формалара, кителлэрэ, синиэллэрэ, каскалар, фуражкалар, офицерскай уонна саллаат суумкалара, кур арааһа, значоктар экспонаттара турдулар. Быыстапка икки салааҕа арахсан оҥоһулунна: «Служу России» уонна «Служу Советскому Союзу». Хас биирдии экспонат туспа историяны, өйдөбүлү саҕан кэлиҥҥи ыччаттарга интэриэһи тардыбыта саарбаҕа суох. Үөрэнээччилэр формалары кэтэн хаартыскаҕа түстүлэр, илиилэринэн тутан-хабан, илэ харахтарынан көрөн олус астыннылар.
Богдан, 10 кылаас үөрэнээччитэ: «Олус үчүгэй, наадалаах быыстапка буолла. Аармыйаҕа бардахпытына, хайдах таҥнарбыт, тугу туттарбыт туһунан биллим».
Даниела, 9-б кылаас үөрэнээччитэ: «Бэртээхэй быыстапкаҕа сырыттым. Формалары кэтэн хаартыскаҕа түстүм, аармыйаҕа туттуллар маллары-саллары тутан-хабан көрдүм. Маннык быыстапкалар өссө да элбии турдуннар».
Манна даҕатан этэр буоллахха, мусуой салайааччыта, быыстапканы көҕүлээччи, география учуутала Валентина Ильинична Жиркова хас биирдии быыстапкаҕа санаатын ууран, экспонаттары хомуйууга күүстээхтик үлэлэһэр.
Саамай элбэх малы-салы бу быыстапкаҕа Валентина Ильинична үөрэппит, кылаас салайааччытынан үлэлээбит оҕолоро, 2015 с. выпуск уолаттара, аҕаллылар диэн киэн тутта кэпсээтэ уонна түгэнинэн туһанан кыттыспыт дьонугар барҕа махталын тиэртэ.
Үөрэтэр, историяны кэрэһилиир быыстапкалар өссө да үксүү, элбии турдуннар диэн биһиги баҕа санаалаахпыт. Кэрэни кэрэхсээҥ, сыаналааҕы үйэтитиҥ!
Л.Н. Харитонов аатынан Маҕарас орто оскуолатын 10 кылаас үөрэнээччилэрэ, Горнай улууһа.
keskil14.ru