Оскуолабытыгар сылын аайы үөрэх дьылын саҕаланыыта оскуола быыбара буолар. Онно 5-11 кылаастар, учууталлар куоластааммыт «Аргыс» оҕо түмсүүтүн салайааччытын, атыннык эттэххэ оскуола президенин талабыт. Манна туруорунааччы кандидаттар эрдэ программаларын таһаараллар.
Быйылгы үөрэх сылыгар 11- ис кылаас үөрэнээччитэ Винокурова Арина иккис сылын быыбарга кыайан президенинэн үлэлии сылдьар.Арина туйгун үөрэнээччи, спортсменка, ырыаһыт, барыга барытыгар көхтөөхтүк кыттан иһэр. Быыбар иннинээҕи программатыгар баар былааннарын олоххо киллэрэн үлэлии-хамсыы сылдьар.
Биир оннук саҕалааһына — «Гордость школы» стенд. Бу анал стендэҕэ кини былаанынан чиэппэр устата кылааһын иһигэр саамай элбэх ситиһиилэрдээх, саамай уопсастыбаннай олоххо көхтөөх, бастыҥ бэрээдэктээх оҕо тахсыахтаах диэн. Ону быһаарааччылар » Аргыс» оҕо түмсүүтэ буолар. Манна уон биир кылаастан биирдии үөрэнээччи хаартыската тахсан чиэппэр устата туруохтаах. Бу стендэни Арина төрөппүттэринээн оҥороннор оскуолаҕа бэлэхтээтилэр. Аҕата Иван Алексеевич тып-тап курдук тимир атахтаах буолар гына сваркалаан, фанераттан анал быһыылаан оҥорбут. Арина ийэтинээн Алена Валерьевналыын ойуулаан, суруйан, кырааскалаан тупсарбыттар, хаартыска угар анал хармааннардаабыттар.
Бастакы чиэппэр бүтүүтэ бэлэм стендэни аҕалан туруоран кэбистилэр. Онон стендэ бастакы хаһаайыттара номнуо миэстэлэрин буллулар. Оттон Аринабыт иккис улахан былаанынан оскуолаҕа радио үлэтин саҕалааһына этэ. Манна да кыыспыт соһуччу үөртэ. Ол курдук, бэйэтиттэн провода суох микрофоннардаах колонка булан аҕалбыт. Бүгүҥҥү күнтэн нэдиэлэҕэ биирдэ, хас оптуорунньук аайы, уһун уоскулаҥ кэмнэригэр радио сонуннары, биллэриилэри, эҕэрдэлэри о.д.а. кэпсиэ, иһитиннэриэ. Онно диктордарынан, сонуну хомуйааччылар, таҥааччылар «Аргыс» түмсүү миниистирдэрэ буолуохтара. Аринабыт былааннарын олоххо кииллэрэр күүстээх санаалааҕыттан , сыалын ситиһэриттэн олус үөрэбит, хайгыыбыт, киэн туттабыт.
Изабелла Ноговицына, Орто Халыма, Өлөөкө-Күөл