Бүгүн Филипп Гаврильевич Охлопков аатынан Майа орто оскуолатын оҕо сэбиэтин уонна Бастыҥнар хамсааһыннарын бэрэссэдээтэлиниин кэпсэттибит. Сиһилии билсиһиэххэ.
– Үтүө күнүнэн! Мин аатым Даша Сидорова. 10 “б” кылаас үөрэнээччитэ буолабын.
– Тоҕо оскуола бэрэссэдээтэлэ буоларга сананныҥ?
– Мин кыра эрдэхпиттэн оскуола актыбыыстара олус чаҕылхайдарын көрөммүн, бэйэм испэр эмиэ олус күүскэ баҕарар этим. Ахсыс кылааска баһаатайдары кытта үлэлээн, бэйэбэр лидерскэй хаачыстыбалары бэлиэтии көрөн, бэрэссэдээтэл буолуохпун баҕарбытым.
– Кыра сылдьан ким буолуоххун баҕарар этигиний?
– Мин кыра сылдьан бэрээдэги көрөр полиция буолуохпун баҕарар этим. Ол да иһин билигин оскуола бэрэссэдээтэлэ буолан олоробун дии саныыбын. Оскуолаҕа бэрээдэги көрөбүн.
– Оскуолаҕа тугу сайыннарыаххын баҕараҕыный?
– Оскуолаҕа оҕолор түмсүүлэрин, “Феникс” оҕо хамсааһыныгар араас тэрээһини, ону таһынан коммунарскай сбордары сайыннарыахпын баҕарабын!
Оскуолабыт эдэр салайааччытыгар ситиһиилээх үлэни баҕарабыт!
Лилиана Попова, 10 «б» кылаас үөрэнээччитэ,
«Түмэн» медиа киин, Ф.Г. Охлопков аатынан Майа орто оскуолата
keskil14.ru