Муус устар 5-6 күннэригэр Таатта улууһун Ытык Күөл Алампа аатынан 1 №-дээх оскуолатыгар ОГЭ, ЕГЭ туттарарга туһалаах тэрээһиннэр буолан аастылар.
Ол курдук М.К. Аммосов аатынан Хотугулуу-Илиҥҥи федеральнай университет преподавателлэрэ естественнэй предметтэргэ – географияҕа, физикаҕа, биологияҕа, химияҕа ОГЭ, ЕГЭ туттарыыга бэлэмниир консультациялары ыыттылар.
Таатта улууһун нэһилиэктэриттэн элбх оҕо, учуутал кэлэн кыттыыны ылла. Мин оскуолабыттан үс Х уонна түөрт IX кылаас оҕолоро буолан үөрэннибит. Бэйэм биологияҕа ЕГЭ туттарар сыаллаахсоруктаах буолан, икки күн устата үөрэнним. Биһигини ХИФУ педагогическай отделениетын сэбиэдиссэйэ Родион Павлович Софронов бэлэмнээтэ, элбэҕи быһааран биэрдэ. Кылааспыт толору оҕо этэ, бары көхтөөхтүк кыттынныбыт. Преподавательбит олус интэриэһинэйдик, киһиэхэ өйдөнөр гына быһааран, дуоскаҕа таһааран суруйтаран үөрэттэ.
Бүтэһик күн Х, IX кылаастары бииргэ түмэн, биология ЕГЭ-тин тиэмэлэрин быһааран кэпсээтэ. Мин Родиог Павлович консультацияларын олус сөбүлээтим, туһанным, өйдөөбөтөх тиэмэлэрбин ситистим.
Оҕолорго маннык консультацияларга сылдьалларыгар сүбэлиэм этэ. Оскуола уонна университет бииргэ үлэлииллэрэ оҕолорго туһалаах уонна көмөлөөх.
Ангелина ДАНИЛОВА, Х кылаас,
В.И. Ленин аатынан Уолба орто оскуолата, Таатта