Нэһилиэнньэ бэйэтэ көҕүлүүр олохтоох инициативалары өйүүр бырагырааманан (ППМИ) билиҥҥитэ элбэх нэһилиэккэ сквердэр, пааматынньыктар, дьиэ ис-тас көстүүтүн саҥардыы, тупсарыы, араас хайысхалаах өрөмүөн, тутуу үлэлэрин курдук, араас туһааннаах бырайыактар олоххо киирдилэр. Аны бу курдук бырайыак оскуолаларга баар буолла. Ол эбэтэр үөрэнээччилэр көҕүлээһиннэрин (инициативаларын) үп-харчы өттүнэн өйүүр бырайыак оҥоһуллан, номнуо өрөспүүбүлүкэ 10 пилотнай үөрэх тэрилтэтигэр 3 мөл. сууммалаах үп-харчы көрүлүннэ.
Бырайыагы 2019 сылтан РФ Үп министиэристибэтин научнай-чинчийэр финансовай института көҕүлүүр. Билиҥҥитэ дойду 19 субъега бу бырагыраамаҕа кыттыста. Ол иһигэр — Саха өрөспүүбүлүкэтэ. Быйыл үөрэнээччилэр көҕүлээһиннэрин өйүүр бырайыак 10 пилотнай үөрэх тэрилтэтигэр: Дьокуускай куорат 2, 7, 12, 30 №-дээх оскуолаларыгар, куорат классическай гимназиятыгар, Хатас орто оскуолатыгар, «Айыы Кыһата» национальнай гимназияҕа, Саха политехническай лицейыгар, Жатай 1 уонна 2 №-дээх оскуолаларыгар киирдэ. Хас биирдии оскуолаҕа бырайыактары көҕүлээһиҥҥэ 300 тыһ. тиэрдиллэн сытар.
Онтон кэлэр сылга бырайыакка Нерюнгри, Мииринэй, Хаҥалас, Нам оройуоннарын оскуолалара кыттыһыахтара. Бу күннэргэ үөрэнээччилэр дьыалабай оонньууларга, интенсивтарга сырыттылар. Ол туһунан манна аах.
Бырайыак сүрүн соругун уонна бырайыакка оскуолалар хайдах кыттыһыахтарын туһунан Эдуард Титов, РФ Үп министиэристибэтин научнай-чинчийэр финансовай института экспердэ кэпсиир. Сиһилии видеоҕа көрүҥ:
keskil14.ru