Оскуола остолобуойа – ханнык баҕарар үөрэх тэрилтэтин быстыспат чааһа. Манна үөрэнээччилэр иҥэмтиэлээх аһылыгы эрэ аһаабаттар, кинилэр ас култууратыгар, санитарнай нуормаҕа, бэрээдэккэ уонна эппиэтинэскэ үөрэнэллэр. Аһылык оҕолор доруобуйаларын бөҕөргөтүүгэ уонна үөрэнэллэригэр, сайдалларыгар табыгастаах усулуобуйаны тэрийиигэ улахан оруоллаах.
Аһылыгы тэрийии уонна хаачыстыбата
Оскуолабытыгар аһылык судаарыстыбаннай санитарнай ирдэбиллэргэ уонна нуормаларга олоҕурар. Остолобуойбут сырдык, ыраас. Саалаҕа табыгастаах остуоллар, олоппостор тураллар. Күннэтэ оскуола остолобуойа 5 кылаастан 11 кылааска диэри үөрэнээччилэри аһынан хааччыйар. Үөрэнээччилэр олохтоммут графигынан аһыыллар. Сарсыардааҥҥы уонна күнүскү аһылык анал тэриллибит миэстэҕэ бэлэмнэнэр. Остолобуойга анал үөрэхтээх, категориялаах асчыттар үлэлииллэр.
Доруобай аһылык – ситиһиилээх үөрэнии мэктиэтэ
Сөптөөх аһылык үөрэнээччилэр ситиһиилэригэр, болҕомтолоругар, санааларыгар быһаччы дьайар. Ол иһин оскуола менютугар бөлөх арыы, углевод, битэмиин уонна минерал кээмэйин нуормалара тутуһуллар. Ханнык баҕарар сааска үүнэр эт-хаан көрдүүр битэмиинин, аһылыгын учуоттаан оҥоһуллубут сөптөөх ас арааһа көрүллэр. Ол курдук, күннээҕи аспытыгар араас курууппаттан хааһы, эт миинэ, оҕуруот астара, отонтон утахтар, макаронтан ас араас көрүҥэ уо.д.а киирэллэр.
Ону таһынан, оскуолаҕа элбэх оҕолоох, кыра дохуоттаах ыал оҕолоругар босхо аһылык тэриллэр. Оскуола дьаһалтата оҕолору иҥэмтиэлээх аһынан хаччыйары күүскэ хонтуруоллуур.
Оскуола остолобуойа – оскуола олоҕун улахан сорҕото: оҕолору түмэр, доруобуйаны бөҕөргөтүүгэ, үлэни-хамнаһы үрдэтиигэ уонна аһылык култууратын тарҕатыыга көмөлөһөр. Үөрэнээччилэр хаачыстыбалаах аһылыктарыгар кыһамньы – кинилэр ситиһиилээхтик үөрэнэллэригэр уонна саастарыгар сөпкө сайдалларыгар кылаат.
Мусьяна Попова, 8 кылаас,
И.Г. Тимофеев аатынан Майа лиссиэйэ.
keskil14.ru