Оскуола – олоҕу түстээччи, олох суолун арыйааччы, уһаарыллан-хатарыллан тахсар кыһабыт, олох бары көрдөбүллэригэр бэлэмнээх буолуутун мэктиэтэ, бар дьоммут, нэһилиэкпит кэлэрэ, кэскилэ, кэнэҕэскитэ.
Иосиф Константинович Софронов П.И. Караканов аатынан Мээндиги орто оскуолатыгар үһүс сылын дириэктэринэн ананан үлэлии сылдьар.
– Үтүө күнүнэн, Иосиф Константинович! Мээндиги орто оскуолатыгар хаһааҥҥыттан үлэлиигитий?
– Мээндиги орто оскуолатыгар мин бэйэм 2015 сыллаахтан үлэлиибин. Аан бастаан кэлэн баран, 5 сыл история учууталынан үлэлээбитим, онтон 2021с. оскуола дириэктэринэн ананан үлэбин саҕалаабытым уонна бу күҥҥэ диэри үлэлии сылдьабын.
– Москваҕа агро оскуолалар салайааччыларын форумнарыгар кыттан кэлбиккитинэн эҕэрдэлиибин. Сүрүн болҕомто туохха уурулунна?
– Москваҕа кулун тутар 28,29,30 күннэригэр форум буолла. Бу форумҥа агро оскуолалар сайдалларын туһугар тирээн турар боппуруостары дьүүллэстибит. Бастатан туран, агро оскуолалар билиҥҥии Арассыыйа таhымыгар хайдах балаһыанньалаахтарын кэпсээтилэр. Билиҥҥи туругунан Арассыыйаҕа агро оскуола сайдыытын таһыма олох үрдүк үктэлгэ тахсыбыт. Үксүн селекция, нанотехнология өттүнэн үөрэтэллэр. Улахан производственнай хаһаайыстыбалар көмөлөhөллөр эбит. Бу хаһаайыстыбалар агро оскуолаларга, оҕолорго биологическай, химическэй чинчийиилэри ыыталлар. Агро оскуоланы бүтэрбит оҕолор агро хайысхалаах үөрэххэ киирэллэригэр көмөлөhөллөр.
– Иосиф Константинович, биһиги оскуолабыт туох уратылааҕый? Оскуола-уһуйааны салайар туох ыарахаттардааҕый?
– Биhиги оскуолабыт бастатан туран агро оскуола буолар, Амма улууhугар биэс агро оскуола баар. 2023 сылтан оскуолабыт оскуола-уһуйаан буолбута. Үлэһиппит, үөрэнээччибит, иитээччибит элбээтэ. Уһуйаан ирдэбилэ олох атын, уратылаах буолар.
– Сүрүн кыһалҕабыт тугуй, ону туоратарга туох үлэ ыытылларый?
– Материальнай, техническай кыһалҕа элбэх. Бастатан туран, тирээн турар улахан кыһалҕабыт – спортзалбыт суох. Билигин ол тутуутугар сүүрэ-көтө сылдьабыт. Ол түмүгэр быйыл спортзалбыт тутуллар буолла.
– Быйылгы сыл Амма улууһугар Олоҥхо сыла, ону таһынан сайын бэс ыйыгар Өрөспүүбүлүкэтээҕи Олоҥхо ыһыаҕа ыытыллар. Биһиги оскуолабыт туох кылааты киллэрэрий?
– Улуус үрдүнэн күүстээх бэлэмнэнии үлэтэ бара турар. Оскуола-уһуйааммыт үлэһиттэрэ, үөрэнээччилэрэ, иитиллээччилэрэ туора турбаккаа кыттыыны ылабыт. Ол курдук, сувенирдары, буклеттары оҥоро сылдьабыт. Дьону көрсүүгэ, аһатыыга кыттыахпыт.
– 2024 сыл Арассыыйаҕа Дьиэ Кэргэн сылынан биллэрилиннэ. Оскуола дьиэ-кэргэни кытта хайдах үлэлиирий?
– Оскуолабыт иһинэн 2023 сылтан «Аҕа түмсүүтэ» тэриллибитэ. Аҕалар көҕүлээһиннэринэн уолаттары быа хатыытыгар, муҥхаҕа, куйуурга үөрэттилэр.
– Иосиф Константинович, инникитин туох саҥа былааннар, соруктар күүтэллэрий?
– Агро туристическай хайысханы үөрэтэн, ити хайысхаҕа үлэлииргэ былаанныыбыт. Байыаннай-патриотическай үлэни күүһүрдэргэ сүрүн болҕомтобутун уурабыт.
– Кэрэхсэбиллээх кэпсээҥҥит иһин барҕа махтал! Чэгиэн доруобуйаны, үлэҕитигэр ситиһиини, махталлаах үөрэнээччилэри, төрөппүттэри баҕарабыт!
Кэпсэттилэр Филипп Олесов, Алгыстаан Степанов, VII кылаас,
Компьютерга таҥна Эмилия Давыдова , IX кылаас,
П.И. Караканов аатынан Мээндиги орто оскуолата, Амма