Оскуола үбүлэниитин көҕүлүүр бырайыактарга үөрэнээччилэр, төрөппүттэр, учууталлар көхтөөх кыттыыны ыллылар. Бырайыак көмүскээһинин иннинэ ыйытык түмүгүнэн икки бырайыак талыллыбыта. Ону истээччилэр дьүүллэригэр таһаардылар. Хамаандалар бырайыактарын чэрчитинэн, презентация, олоххо киллэрэргэ былааннарын суот-учуот оҥорон, төһө үп-харчы наада буоларын суоттаан, интэриэһинэй бырайыактары оҥорбуттар.
Биһиги хамаандабыт оскуолаҕа «Инфостудия» медиа эйгэни тэрийии бырайыагын көмүскээтибит. Онно подкастары оҥорор, сонуннары суруйар зона, социальнай ханаалларга контент бэлэмниир баҕалаахтар.
Онтон Саша Михайлов, Сабрина Соколова хамаандалара «Остров «Рекреация»» диэн сынньалаҥы хайдах аныгылыы хайдах тэрийэр туһунан бырайыактары билиһиннэрдилэр. Оҕолор бэйэ-бэйэлэрин кытта кэпсэтэн, санаа атастаһан, араас оонньууну оонньоон, сэһэргэһэн, туhалаахтык сынньаныахха сөбүн эттилэр. Оҕолор бырайыактарыгар төһө үп-харчы көрүллүөн сөбүн суоттаан, хас биирдии бырайыак туһалаах уонна наадалаах буоларын туһунан эттилэр.
Аһаҕас куоластааһын түмүгүнэн үөрэнээччилэр, төрөппүттэр уонна учууталлар «Остров «Рекреация»» бырайыак кыайыылаах тахсан, салгыы өрөспүүбүлүкэ үбүлүүр бырайыактарын сүүмэрдиир күрэһигэр кыттыыны ылыаҕа.
Маннык тэрээһиннэр оҕолору толкуйдатар, сөптөөх быһаарыыны ылынар, ааҕан-суоттаан көрөр дьоҕурдарын сайыннарар, толкуйдатар, элбэххэ үөрэтэр.
Айна ПОТАПОВА, Х кылаас,
Маар Күөл орто оскуолата, Сунтаар
Уйгууна Иванова хаартыскалара