Үөһээ Бүлүү Ороһу нэһилиэгин оскуолата эргэрэн, үөрэнэргэ, үлэлииргэ көҥүллэммэтин иһин, көтүрбүттэрэ. Үһүс сылбытын хас да сиринэн үөрэнэ сылдьабыт. Мин бу күннэргэ оскуолабыт тутуута хайдах бара турарын нэһилиэкпит баһылыгыттан туоһуластым.
2023 сыл сааһыттан Ороһу нэһилиэгин баһылыга Анатолий Васильевич Антонов сүүрэн-көтөн, улуус салалтатыгар, СР Бырабыыталыстыбатыгар туруорсан, 120/70 миэстэлээх оскуола-саад 285 устуука сыбаайата түһэн, төгүрүтүллэн, таас кирпииччэ дьаарыстанан икки этээстээх, толору хааччыллыылаах оскуола-саад тутуллан тахсарыгар бэлэм буолла.
— Бу үлэни тендергэ кыайыылаах тахсан Дмитрий Алексеевич Петров, прорабынан Константин Владимирович Корякин, уон биир армян омуктары, аҕыс саха киһитин үлэлэттилэр. Ороһуттан тыраахтарынан тиэйэр-таһар үлэҕэ Юлиан Иванович Иванов, харабылынан Николай Николаевич Николаев, акылаат түһэрин чуолкай кээмэйин тутуу инженерэ үөрэхтээх (геодезист ) Фёдор Николаевич Болтоков, асчытынан Мария Юрьевна Прокопьева үлэлээтилэр.
Атырдьах ыйын 11 күнүгэр Ил Дархан Айсен Сергеевич Николаев Үөһээ Бүлүүгэ үлэтинэн кэлэ сылдьан, Ороһуга оскуола тутуутун хаамыытын тахсан билсибитэ. Көрөн баран, кинини кытта кэлэ сылдьар СР Бырабыыталыстыбатын бастакы солбуйааччыта Кирилл Евгеньевич Бычковка, тутуу миниистирэ Павел Павлович Кылатчановка, оскуола тутуутугар 2024 сылга үбү көрөн, хойутаабыта 2025 сыл балаҕан ыйыгар оскуола толору ситэн, үлэҕэ киирэрин курдук дьаһаныҥ диэбитин истэн, олохтоохтор үөрэ иһиттибит. Оскуолабыт тутулларыгар Ил Түмэн быыбарыгар депутакка кандидат Феодосия Васильевна Габышева улахан көмөлөөх, — диэн кэпсээтэ баһылык Анатолий Васильевич.
Биһиги 37000 квадратнай миэтэрэлээх, толору хааччыллыылаах оскуолаҕа үөрэниэхтээхпититтэн үөрэбит уонна астына күүтэбит.
Эдкор Ванесса Васильева, салайааччы Н.Н. Михайлова, «Тымтык» эдкорпост, Ороһу.