2024 сылы Россия Президенэ Владимир Путин Дьиэ кэргэн сылынан, Саха Республикатын Ил Дархана Айсен Николаев Оҕо саас сылынан биллэрбиттэрин көрсө Ороһу нэһилиэгэр «Күбэйэ» эбээлэр түмсүүлэрэ (салайааччы Н.В. Котоконова) түөлбэ дьиэ кэргэнигэр остуоруйа күрэҕин тэрийэн ыытта.
Күрэх сыала-соруга: остуоруйа иитэр-үөрэтэр өрүтүн өрө тутуу, дьиэ кэргэн биир санааҕа киириилэрэ, оҕо-саас умнуллубат түгэнин бэлэхтээһин.
Күрэх түмүгүнэн «Саҥа Кустук» түөлбэттэн Анисимовтар дьиэ кэргэттэрэ «Кыһыл бэргэһэчээн» остуоруйанан 1 миэстэни ылан 5000 солк. бириэмэйэнэн наҕараадаланнылар, «Атах» түөлбэттэн Кардашевскайдар «Кыһыл бэргэһэчээн» — 2 миэстэни ылан 3000 солк., «Нукутта» түөлбэттэн Захаровтар «Күн, ый, сулус» остуоруйа көрдөрөн 3 миэстэҕэ тиксэн 2000 солк. уонна Н.В. Котоконова астаабыт тордунан, грамотанан наҕараадаланнылар. «Көрөөччү биһирэбилин» Кардашевскайдар дьиэ кэргэттэрэ «Күбэйэ» түмсүү туруорбут анал бирииһин тутта. Харчынан бирииһи элбэх оҕо ийэлэрэ, эбээлэрэ Павлова М.А., Ласточкина А.С., Васильева Л.И., Адамова Е.А., Малахаева Е.Н. туруордулар.
Көрөөччүлэр санаалара: «Наһаа үчүгэй остуоруйалары көрдүбүт. Тэрийээччилэргэ барҕа махтал!».
2024 сылга дьиэ кэргэттэргэ, оҕолорго ситиһии сиэттиһэ, доруобуйа туругура, олох-дьаһах тупса, үлэ-үөрэх барҕара туруохтун!
«Тымтык » э/пост, Ороһу, Үөһээ Бүлүү.