Саха сириттэн, Өймөкөөнтөн, Россия тэбэр сүрэҕэр Москваҕа 1 сыл 4 ый саха атынан айаннаан тиийбит Дугуйдаан Семёнович Винокуров уолунаан Дарханныын Ороһуга саха балаҕаныгар ыалдьыттаан бардылар.
Ыалдьыттары сылаас алаадьынан, итии чэйинэн «Күбэйэ» эбээлэр түмсүүлэрин салайааччыта Надежда Васильевна Котоконова көрүстэ.
Дугуйдаан Семёнович Винокуров боппуруостарга эппиэттээбитин түмэн суруйабыт.
— Айаным сүрүн сыала — саха ата тулуурун, дьулуурун, сылаатын түргэнник аһарынарын, Москваҕа тиийэн дакаастааһын. Өймөкөөнтөн Москваҕа тиийиэхпэр диэри үтүө дьон көмөтүнэн айаннаатым. Кинилэргэ махталым улахан. Айаным устата аттарбар, быһахпар, Чап уустара оҥорон биэрбит харысхалларыгар уонна бэйэбэр эрэллээх буолан айан уустугун этэҥҥэ аһардым.
Оскуолаҕа ортотук үөрэммитим. Үөрэҕим кэнниттэн наар аҕабын кытта сылгыга сылдьыһарым. Халысхан диэн анал аттааҕым. Сырыыны сылдьар ат этэ. Биирдэ 50 км олох тохтообокко айаннаан баран эмискэ турунан кэбиспитэ. Сылайбыт диэн хаалларбыппыт, сарсыныгар тиийбиппит, хаалбыт сиригэр турар эбит, сиэтэн аҕалан, биир нэдиэлэ аһатааппытын кытта, тир гына түспүтэ. Хор, ол курдук саха сылгыта барахсан сылаатын түргэнник аһарынар.
Аҕам миигин таптаан ымманыйбат этэ, ол оннугар үөрэхпин, үлэбин сыаналыыра. 8 кылааһы бүтэрбиппэр компьютер, 11 кылааһы бүтэрбиппэр, массыына ылан биэрбитэ.
Ийэм, Ирина Христофоровна, аҕам Семён Львович Винокуровтар сылгыны көрүү үөрүйэхтэригэр, миинэр миҥэ, ас амтаннааҕа буоларын оҕолорго иҥэрэр сыаллаах «Юный всадник» диэн лааҕыр аһан үлэлэтэллэр.
Инники былааннарым, Өймөкөөҥҥө сылгы туризмын сайыннарыы, Дьокуускайга Сылгы түмэлин арыйыы. Тохсунньу-олунньу ыйдарга -70 кыраадыс тымныы буолар дииллэр, саха ата тымныыны тулуйарын киэҥ эйгэҕэ таһаараары Магадаҥҥа барар санаалаахпын. Өссө инникитин, балаһыанньа тубустаҕына, Азия диэки барбыт киһи.
Оҕолорго эһиэхэ туһаайан этэбин, саха итэҕэлэ — Айылҕа! Айылҕаны харыстааҥ, алтыһыҥ, доҕордоһуҥ!
Онтон Дуолан кэлбит оҕолорго 3 кылааска үөрэнэрин, үөрэҕэр үчүгэйин, тустуунан дьарыгырарын кэпсээтэ. Республикаҕа 29 кг ыйааһыҥҥа — 3 м, Бүлүүгэ ыытыллыбыт күрэххэ 1 миэстэлээҕин эттэ. Кини аҕатын холобур оҥосторун, Казань куораттан Москваҕа аҕатынаан айаннаабытын, айантан олох сылайбатаҕын этэн аһарда уонна улааттаҕына аты кытта чугастык алтыһыахтааҕын чорботон иһитиннэрдэ.
Уоллаах аҕа Винокуровтар ыҥыран ыалдьыттаппыт Ороһу орто оскуолатын кэлэктиибигэр, «Күбэйэ» эбээлэр түмсүүлэригэр махталларын тиэртилэр.
«Тымтык» эдкорпост, Ороһу орто оскуолата.