Илья Егорович Винокуров аатынан Намнааҕы педагогическай колледжка үлэлии сылдьар учууталлары, ону тэҥэ өр сылларга үлэлээн-хамсаан кэлбит бэтэрээн учууталларбытын уонна айар үлэ быыстапкатын арыллыытын чиэстиир үөрүүлээх тэрээһиммитин үрдүк таһымҥа бэлиэтээтибит.
Бүгүн биһиги РСФСР норуотун үөрэҕириитин туйгуна, Арассыыйа Федерациятын орто анал үөрэхтээһинин бочуоттаах үлэһитэ, Саха Өрөспүүбүлүкэтин үөрэхтээһинин үтүөлээх үлэһитэ, бочуоттаах бэтэрээнэ, Нам улууһун бочуоттаах гражданина, Арассыыйа худуоһунньуктарын сойууһун чилиэнэ, живописец худуоһунньук, учууталбыт Фёдор Федорович Павлов 85 сааһын туолар үбүлүөйдээх бэлиэ күнүгэр анаан, «Мин олоххо тапталым» диэн айар үлэтин быыстапкатын арыллыытыгар үөрэ-көтө муһуннулар.
Быыстапка ааптарын туһунан кэпсиир буоллахха, Фёдор Фёдорович 1940 сыллаахха атырдьах ыйын 31 күнүгэр Горнай улууһун Бэс Күөл нэһилиэгэр күн сирин көрбүтэ. Оҕо сааһа сэрии ыар кэмигэр ааспыта, тулаайах хаалан олох кыһалҕатын этинэн-хаанынан билбитэ. Оскуолаҕа үөрэнэр кэмнэригэр спорт араас көрүҥнэринэн дьарыктанара.
1960 сыллаахха оскуоланы бүтэрэн райкомол көҥүлүнэн Дьокуускайдааҕы ойуулуур-дьүһүннүүр училищеҕа үөрэнэ киирбитэ. Үөрэҕин олус күүскэ сөбүлээн дьаныһан туран үөрэммитэ. Живопись уруогун Аҕа дойду Улуу сэриитин бэтэрээнэ, живописец-худуоһунньук Семен Лаврентьевич Александров үөрэппитэ.
1962 сыллаахха олоҕун аргыһын Екатерина Павловнаны көрсөн ыал буолбута.
1964-1967 сс. Сэбиэскэй аармыйаҕа ыҥырыллан ытык иэһин толорбута. Аармыйаттан кэлэн баран, 1968 сыллаахха үөрэҕин бүтэрэн биир сыл Горнайга, Бүтэйдээх култууратын дьиэтигэр дириэктэринэн үлэлээбитэ.
Намҥа педучилищеҕа ИЗО учууталынан үлэлии сылдьан талаанын өссө арыйар, искусство эйгэтин өссө дириҥник баһылыыр баҕаттан 1972-1977 сс. Владивосток куоракка Дальнай Востоктааҕы искусство государственнай институтугар живопись факультетыгар идэтин үрдэппитэ.
Фёдор Фёдорович Илья Егорович Винокуров аатынан Намнааҕы педколледжка олоҕун 40-н тахса сылын оҕону иитиигэ үөрэтиигэ анаабыт, үтүмэн элбэх оҕо махталын ылар тумус туттар учууталлара буолар.
Айар үлэтэ 1980 сылтан сүрдээх киэҥ хабааҥнаахтык саҕаламмыт. Араас жанрдарга холонон, айылҕа, олох-дьаһах туһунан кэпсиир, Саха сирин историятыгар сыһыаннаах айымньылара элбэх быыстапкаларга дьон-сэргэ биһирэбилин ылбыттара.
Билигин кини үөрэнээччилэрэ учуутал идэтин баһылаан ситиһиилээхтик үлэлии-хамсыы сылдьаллар. Дойдуларын аатын ааттатар биһиги киэн туттар дьоммут буолаллар: СӨ норуотун худуоһунньуга, Арассыыйа худуоһунньуктарын академиятын чилиэн-корреспондена Артур Дмитриевич Васильев, норуот маастара, Арассыыйа худуоһунньуктарын сойууһун чилиэнэ Зоя Серафимовна Аммосова, ювелир-худуоһунньук, Арассыыйа худуоһунньуктарын сойууһун чилиэнэ Роман Христофорович Петров, муустан оҥоһук Бүтүн Арассыыйатааҕы, Аан дойдутааҕы куонкурустар хас да төгүллээх кыайыылааҕа Александр Иванович Шадрин.
Фёдор Фёдорович 1995 сыллаахха Арассыыйа худуоһунньуктарын сойууһун чилиэнэ буолбута. Олоҕун аргыһынаан Екатерина Павловналыын үс кыыс оҕолоохтор. 10 сиэн, 6 хос сиэн тапталыгар угуттанан ыал буолбуттара быйыл 65 сыллара буолар.
Бу үөрүүлээх күн Фёдор Фёдорович өр сылларга бииргэ үлэлээбит худуоһунньук коллегалара, биир дойдулаахтара, оҕолоро, сиэттэрэ истиҥ эйэҕэс эҕэрдэ тылларын, сибэкки дьөрбөтүн, бэлэхтэрин туттардылар.
Нам улууһун үөрэхтээһинин сайдыытыгар кылаатын, сыратын ууран туран үлэлээбитин иһин «Ытык саас» бочуоттаах бэлиэни үөрүүлээх быһыыга-майгыга туттардылар.
Салгыы Фёдор Фёдорович Павлов кыраҕы хараҕынан, мындыр өйүнэн, уус тарбаҕынан айбыт сыралаах үлэтин дьон-сэргэ сэҥээриитин ылар, кутун-сүрүн уһугуннарар дьикти алыптаах, өр сылларга кичэйэн үөрэтэн оҥорбут үлэлэрин арыйар чааһын долгуйа көрдүбүт.
Мин Фёдор Фёдоровичтан бэйэтин санаатын этэригэр көрдөстүм.
Бүгүҥҥү күнүм миэхэ олус интэриэһинэй дьикти күнү бэлэхтээтэ. Бүгүн сарсыарда таһырдьа тахсан көрбүтүм сырдык, ыраас халлаан, күүстээх сырдык күн уота сандаарыйа тыкпытыттан көрөн астынан, «оо, олус да үчүгэй күн үүммүт» диэн махтана санаабытым. Ол санаабытым, кырдьык даҕаны, бүгүн үлэлээбит оскуолабын, үөлээннээхтэрбин көрөн үөрэн, дьоллонон сарсыардааҥҥы күн уота элбэх да кэрэни бэлэхтээтэ диэн махтанан турабын. Тоҕо диэтэххэ, киһи үлэлээбит сирэ, үөрэппит оҕолоро дьоллоруттан, ситиһиилэриттэн көрөн олус үөрдүм. Киһиэхэ үөрэппит оҕотун ситиһиитэ, учуутал үлэтин түмүгэ, онон үөһээ айыыларга, бары учууталларга, ыалдьыттарга бүгүҥҥү күнү бэлэхтээбиттэриттэн махтал тылбын тиэрдэбин. Бары дьоллоох-соргулаах, уһун үйэлээх үөрэхтээх дьон буолун диэн алгыс тылбын этэбин, —
диэн Фёдор Фёдорович Павлов санаатын үллэһиннэ.
Эрчим НИКОЛАЕВ, И.Е. Винокуров аатынан Намнааҕы педагогическай колледж устудьуона