Быйыл «Кэскил» оҕо бэчээтин кыһата «Чуораанчык», «Колокольчик» оҕо сурунааллара төрүттэммиттэрэ 35 сылыгар анаан «Волшебный мир Колокольчика» интерактивнай кинигэни бэчээттээн таһаарда.
Саҥа таһаарыы туһунан саха норуодунай суруйааччыта Сэмэн Тумат санаатын үллэстэр.
– Соторутааҕыта буолан ааспыт «Бэчээт тиэргэнэ-2022» кинигэ дьаарбаҥкатыгар сылдьан мин элбэҕи эргитэ санаатым: норуотум историятын, бэчээт үөскээһинин историятын, хаһыаттар, сурунааллар хайдах тахсан испиттэрин. Олору ситимниир билигин туох баарый? диэн ыйытыкка бу ыытыллыбыт дьаарбаҥка киэҥ хоруйу биэрдэ.
Норуодунай суруйааччыбыт Амма Аччыгыйа аатын сүгэр «Кэскил» оҕо бэчээтин кыһата «Чуораанчык», «Колокольчик» оҕо сурунааллара төрүттэмиттэрэ 35 сылыгар анаан таһаарбыт кинигэлэрин ааҕааччы ытыс үрдүгэр түһэрэн көрүстэ. Олус үчүгэй таһаарыы!
«Бэчээт тиэргэнигэр» атыыга хамаҕатык барбытын мин улаханнык бэлиэтии көрдүм уонна норуот дьиҥнээхтик аан дойду таһымыгар тиийэр таһаарыыларга наадыйар көстүүтүн курдук ылынным. Уонна норуот улахан дьоннорун үтүө санаалара олоххо ыпсан иһиилэрин кирбиитигэр баарбын эбит диэн сананным.
Сахалар бөдөҥ суруйааччыбыт Сэмэн Данилов бэйэтэ салайан ыыппыт сийиэһигэр: «Биһиги хайаатар даҕаны «Мурзилка» курдук оҕо сурунаалланнахпытына сатанар», – диэн эппитэ. Көр, билиҥҥи «Чуораанчыгы», «Колокольчигы» ол улахан «Мурзилка» таһымыгар тэҥниэҕиҥ дуо?! Бүгүҥҥү «Чуораанчык», «Колокольчик» саҥа таһаарыыларыгар улахан дьоннорбут этиилэрин, үтүө санааларын, ыллыктаах өйдөрүн аныгы үйэ кирбиитигэр ыпсаран иһии үтүө холобурун көрөбүн. Оҕо литературатын күүскэ көрдөрөр, оҕо дьоҕурун, талаанын, кини баҕатын төрүт үгэһи кытта тэҥҥэ алтыһыннаран ситимниир ис хоһоонноох таһаарыылары оҥорор сурунааллар буоллулар.
Дамир, Марк Олесовтар «Чуораанчыктар» саамай көхтөөх ааҕааччылара. Уус Алдан Кэптэнитигэр олороллор. Дамир IV, Марк II кылааска Лөгөй орто оскуолатыгар үөрэнэллэр.
Кинилэр эмиэ саҥа кинигэ туһунан санааларын үллэһиннилэр.
– Биһиги быйыл сайын Чуораанчык 35 сааһыгар бырааһынньыкка сылдьыбыппыт. Наһаа үчүгэй кинигэ бэлэх туппуппут. Дьиэбитигэр кэлэн баран арыйбыппыт – иһигэр сиэптээх, кэмбиэрдээх, куукулалардаах. Кинигэни арыйан истэҕин аайы тахсан иһэр, тахсан иһэр, тахсан иһэр. «Чуораанчыкка» тахсыбыт билэр уруһуйдарбыт бааллар. Өссө бу кинигэҕэ Саха сирин картата баар.
Билии күнүнэн, 2022-2023 үөрэх дьыла саҕаламмытынан сабыс-саҥа интерактивнай кинигэни бэлэхтээҥ! Сиһилии 89142790160 төл. билсиҥ.
Сардаана МАТВЕЕВА.