Успуорт — хас биирдии киhи олоҕор алтыhан ааhар көрүҥэ. Оттон успуорт өттүгэр талааныҥ арылыннаҕына, ол эн олоххор эн талааныҥ арылларыгар олук уурбут киhи үтүөтэ.
Василий Николаевич — оҕо кыаҕын арыйар ньымалардаах учуутал. Кини Эҥэ орто оскуолатыгар физическэй култуура учууталынан үлэлээбитэ ыраатта. Учуутал оҕолору кытта элбэхтик алтыhар, кинилэр эт-хаан өттүнэн чэгиэн буолалларыгар анаан, уруогар араас ньымалары туhанар. Кинилэр бу дьарыктара үөрүйэххэ кубулуйалларыгар сүрүн болҕомтотун уурар. Кини уруогар сылдьан, буспут-хаппыт уолаттартан Дмитрий Стручков национальнай көрүҥҥэ (ыстаҥа) успуорт маастара буолбута. Оттон хапсаҕай курдук саха норуота олус сөбүлүүр көрүҥэр Сергей Рожин, Николай Рожин, Виктор Бурцев о.д.а. успуорт маастардарын аатын сүкпүттэрэ. Бу барыта учуутал сыралаах үлэтин түмүгэр ситиhиллэр, бу ођолор сүрэхтэригэр успуорка тапталы, дьулууру иңэрииттэн тахсар.
Василий Николаевич уруогун таhынан саахымат, дуобат куруhуогун ыытар. Бу куруhуокка оҕолор сөбүлээн сылдьаллар. Yлэлээбит сылларыгар Василий Николаевич 40-н тахса оҕону республиканскай күрэхтэhиилэргэ кытыннаран, 10-н тахса мэтээли аҕалан, дьонун-сэргэтин үөрдүбүтэ. Ордук ситиhиилээх оҕолорунан Алеша Гоголев, Диана Бурцева, Айтал Рожин, о.д.а. буолбуттара. Бу оҕолор Россия дуобакка чемпионатыгар кыттыбыттара. Биир оҕо 2-с миэстэ буолбута, 4 оҕо уон иhигэр киирбитэ. Оройуон иhигэр күрэхтэhиигэ 35 сылы быhа киирсэн, сыл аайы миэстэлэhэн кэлэллэр. Бэйэтэ араас чемпионаттарга ситиhиилээхтик кыттар. Маны таhынан, бэйэтэ көҕүлээhининэн национальнай ыстаҥаҕа, дуобакка оройуоннааҕы күрэхтэhиилэри тэрийбитэ.
Бу курдук, куруук үлэ үөhүгэр сылдьар, Василий Николаевич 2015 сыллаахха «Лучший тренер» аатын, оттон 2017 сыллаахха «Сыл учуутала» куонкуруска кыттан, «Здоровый дух» номинацияны ылбыта. В.Н. Слепцов идэтин таhымын куруук үрдэтэр. 2001 сыллаахха Москубаҕа дуобатчыттар сэминээрдэригэр кыттар, «Саахымакка оонньуу ньымалара» дакылаатын көмүскүүр.
Ити курдук, кини дуобакка, саахымакка эрчийбит оҕолоро олоххо дириҥ толкуйдаах үктэнэллэр, бары олохторун суолун таба тайанан, таhаарыылаахтык үлэлии сылдьаллар.
Василий Николаевич — дьиэ кэргэн үтүөкэн аҕата, кэргэнинээн Полина Константиновналыын оҕолорун олоххо дьулуурдаах, үлэҕэ дьоҕурдаах, үөрэхтээх дьон гына иитэн таhаардылар. Василий Николаевич быйыл 60 сааhын туолла эрээри, эдэрдии эрчимин ыhыктыбат, үлэтэ-хамнаhа күөстүү оргуйар.
Екатерина Заровняева, «Саһарҕа» пост салайааччыта, Эңэ.