Олунньу 14 күнүгэр Бордоҥ нэһилиэгэр култуура уонна сынньалаҥ киинигэр Саха өрөспүүбүлүкэтин Бырабыытылыстыбатын 2023 сыллааҕы үлэтин отчуоттуур мунньаҕа буолан ааста.
Отчуоттуур бөлөҕү Саха өрөспүүбүлүкэтин Доруобуйа харыстабылын миниистирин маҥнайгы солбуйааччы Сергин Дмитрий Дмитриевич салайан кэллэ. Мунньах ааспыт сылга ыытыллыбыт бырабыыталыстыба үлэтин отчуоттуур киинэ матырыйаалынан саҕаланна.
Бордоҥ олохтоохторо бу курдук санааларын үллэһиннилэр.
Оскуола директора Михаил Алексеевич Максимов оскуолаҕа учуутал кэлиитэ аҕыйаҕын, билиҥҥитэ информатика учуутала суох олороллорун эттэ.
Үөрэҕи бүтэрэн эрэр орто уонна үрдүк үөрэх устудьуоннара дуогабар баттаһан баран үлэлии кэлбэт түгэннэрэ элбэҕин ыйда. Онно 3 өттүттэн сөбүлэҥ оҥоһуллара буоллар, үөрэҕи бүтэрбит исписэлиис кэлэн 3-5 сылга сөбүлэҥ быһыытынан үлэлиэ этэ.
Прокуратура бу уустуктардаах кэмҥэ (СВО), харчы эҥин аҕыйах кэмигэр, оскуолалары бэрэбиэркэлиир үлэтин кыратык сымнатара кыаллыа дуо диэн санаа этилиннэ.
Тыа хаһаайыстыбатын исписэлииһэ Николай Алексеев элбэх сир-уот ууга сытарын, сиртэн тыа хаһаайыстыбатын сайдар кэскилэ тутулуктааҕын, улууска мелиорация управлениета арыллара олус наадатын этэн туран, ону болҕомтоҕо ылалларыгар көрдөстө.
Маны таһынан, балыыһа, оскуола тутуллуутун, суол оҥоһуллуутун боппуруоһун күүстээхтик туруорустулар.
Бордоҥ дьоно-сэргэтэ ситэриилээх былаас отчуоттуур мунньаҕын “үчүгэйинэн” сыаналаатылар.
Маннык мунньахха бастакыбытын сылдьар буоламмыт, биһиэхэ олус интириэһинэйдик ааста. Кырдьык, баар кыһалҕаны нэһилиэк олохтоохторо кистээбэккэ этэллэрэ, туруорсаллара сөптөөх.
Бордоҥмут суолугар капитальнай ремонт ыытыллыбатаҕа ырааппыт буолан чахчы сааһын, сайынын, күһүнүн суоппардар, олохтоохтор улахан кыһалҕаны көрсөллөр. Федеральнай суолтан туора олорор буоламмыт муниципалитет бас билиитигэр киирэр. Ол иһин үксүн грейдэрдииллэр эрэ, онтубут аҕыйах хонон баран төттөрү уруккутугар түһэр. Хата быйыл капитальнай ремонт ыытыллыа диэни үөрэ, сэргии иһиттибит.
✅Ону тэҥэ оскуолабыт 2004 сыллаахха мас оскуола үтүө дьыаланан туттуллан үлэҕэ киирбитэ. Бастаан киирэригэр олус тымныы этэ. Онтон кэлин ремонт үлэтэ ыытылларын суотугар сылыйбыта эрээри, билигин баһаарынай ирдэбилгэ эппиэттээбэтин бары да билэбит. Биһиэхэ да хаһан эрэ таас оскуола үлэҕэ киириэ диэн эрэллээхпит.
Бу курдук, бырабыытылыстыба үлэһиттэрэ хас биирдии нэһилиэк дьонун тус санааларын истэн, боппуруостарыгар эппиэттээтилэр. Барбыт үлэни отчуоттуура наадалаах уонна туһалаах диэн көрдүбүт.
Бордоҥмут тупсарыгар, сайдарыгар өссө да элбэх үлэ былааннанарын истэммит үөрдүбүт, билигин үлэлии сылдьар эдэр баһылыкпытын К.А.Уаров үлэтин, туруорсуутун үрдүк сыанаттан хайҕаабыттарын истэн олус үөрдүбүт, киэн тутта санаатыбыт. Биһиги оҕолор эмиэ нэһилиэкпит тирэхтээх буоларыгар кыһаллыахтаахпыт.
Галя Матросова, Анжелла Михайлова, 8 кылаас үөрэнээччилэрэ, Бордоҥ, Сунтаар