Саха өрөспүүбүлүкэтин Бырабыыталыстыбатын отчуотун түмүктүүр мунньаҕа олунньу 28 күнүгэр Чурапчы нэһилиэгэр буолан ааста. 2024 сыл устата өрөспүүбүлүкэ бары салаатыгар туох үлэ ыытыллыбытын туһунан кэпсээтилэр. Өрөспүүбүлүкэ Бырабыыталыстыбатын министиэристибэтин эппиэттээх салайааччылара кэлбиттэр.
Сүрүн дакылааты бөлөх салайааччыта, Саха өрөспүүбүлүкэтин Бырабыыталыстыбатын бэрэссэдээтэлин бастакы солбуйааччыта Джулустан Анатольевич Борисов оҥордо. Ааспыт сылга хас оҕо төрөөбүтүттэн, дьиэ кэргэни өйүүргэ ыытыллар үлэттэн саҕалаан, тыа хаһаайыстыбатын сайдыытыгар ыытыллыбыт үлэҕэ тиийэ сиһилии кэпсээтэ.
Чурапчы нэһилиэгин олохтоохторо долгутар ыйытыыларын биэрдилэр, баар кыһалҕалары туруорустулар. Бырабыыталыстыба салалтатын иннигэр икки сүрүн боппуруоһу туруордулар – кырдьаҕастар дьиэлэрин уонна С.А. Ноҕуруодап аатынан Чурапчы орто оскуолатын салҕааһынын тутууну.
Чурапчы улууһугар ыытыллыбыт отчуот түмүгүнэн бэйэтин санаатын үллэстэригэр Үлэ уонна социальнай сайдыы миниистирин солбуйааччытын Коротких Иннокентий Владимировыһы көрсөн кэпсэттим.
– Үһүс бөлөх олунньу 26 күнүттэн саҕалаан Мугудай, Төлөй Дириҥэ, Арыылаах, Кытаанах, Хатылы уонна Чурапчы нэһилиэктэригэр сылдьан үлэлээтибит. Чурапчы улууһа тыа сирэ буоларынан сибээстээн, ордук улахан долгутар боппуруостар тыа хаһаайыстыбатын кытта сибээстээхтэр. Олохтоохтор ордук үүт туттарыытын сыанатын, дьиэ кыылын чииптээһин, чааһынай дьиэлэри ититии ситимигэр холбооһун, саҥа хочуолунай тутуутун туһунан туоһулаһаллар. Мугудайга гаас ситимэ хаһан киирэрин туһунан ыйыталастылар. Отчуоттуур мунньахха элбэх ыйытыы киирдэ. Барытын иһиттибит, быһааран биэрдибит. Билигин сатаан кыаллыбат ыйытыылары протоколга киллэрдибит. Олохтоохтор туруорсууларын, ыйытыыларын сыл устата быһаарар туһугар ситимнээх үлэ ыытыллыаҕа, – диэн эттэ И.В. Коротких.
Былаас уонна нэһилиэнньэ икки ардыгар ыытыллыбыт кэпсэтии түмүгүнэн, Чурапчы нэһилиэгин олохтоохторо Саха Өрөспүүбүлүкэтин Бырабыыталыстыбатын 2024 сылга ыытан кэлбит үлэтин сөптөөҕүнэн сыаналаатылар.
Сыл аайы Бырабыыталыстыба отчуотугар норуот кыһалҕатын, көрдөһүүтүн, ирдэбилин салалта болҕомтоҕо ылан, ону быһаарар туһугар үлэ ыытыллара, мин санаабар, олус үчүгэй.
Бу тэрээһин былаас уонна норуот икки ардыгар итэҕэтиилээх сыһыаны олохтуур. Үлэһит дьон, дьиэ кэргэн, оҕолор сайдарбытыгар, кыһалҕата суох үлэлиирбитигэр, сарсыҥҥы күҥҥэ эрэллээх буоларбытыгар өрөспүүбүлүкэ салалтатын өттүттэн өйөбүлү күннэтэ билэбит. Онон кыһалҕа диэни билбэккэ, үөрэнэн, үлэлээн иһиэххэйиҥ, эйэлээх буолуоххайыҥ!
София ГОГОЛЕВА, VIII кылаас, «Тумус кыһа» медиа киин,
С. К. Макаров аатынан Чурапчы гимназията
Валерия Степанова хаартыскалара, VIII кылаас