Н.Е. Мординов-Амма Аччыгыйа аатынан Харбалаахтааҕы үөрэхтээһин холбоһугар Орто Амма тыа сирин түөлбэтигэр Олоҥхо ыйыгар аналлаах тэрээһиннэри түмүктүүр дьоро күн буолан ааста.
Бастаан оскуола 3-11 кылааһын үөрэнээччилэрэ бары Аал Луук маһы тула олорон, олохтоох автор Иван Иванович Слепцов «Эрэмэччи бухатыыр» олоҥхотун күргүөмүнэн толордулар. Бу олоҥхону 90 үөрэнээччи бииртэн биир солбуһан өйтөн ааҕан, ыллаан-туойан толорбуттара сүрдээх дьоһун, кэрэ көстүү буолла.
Олоҥхоһут огдообото Мария Степановна Слепцова Аал Луук мас таһыгар талах олоппоско олорон иһиттэ уонна маннык сүҥкэн толорууттан долгуйбутун, астыммытын эттэ. Салгыы оскуола аактабай саалатыгар киирэн, бу тэрээһиннэри иилээбит-саҕалаабыт ускуустуба оскуолатын учуутала Варвара Алексеевна Парфенова ыытыллыбыт үлэлэр туһунан хаартыскаларынан дьүһүйбүт презентациятыгар тирэҕирбит кэпсээнин иһиттибит.
Быйылгы олоҥхоҕо аналлаах тэрээһиннэр олохтоох автор Иван Иванович Слепцов айар үлэтигэр ананан ыытыллыбыта олус кэрэхсэбиллээх. Иван Иванович кэргэнэ олоҥхону сөбүлээн толорооччу Мария Степановна Слепцова өссө төгүл оҕолорго барҕа махталын тиэртэ уонна оскуола библиотекатыгар кэргэнин олоҥхото бэчээттэммит кинигэтин бэлэх уунна.
Олохтоох библиотека үлэһитэ А.В. Тарабукина Олоҥхо дьыктаанын Харбалаахтан элбэх киһи суруйбутун бэлиэтээн туран, бастыҥнарга Махтал суругу туттарда. Учуутал В.С. Кривошапкина оҕолору хайҕаата уонна оскуола иһинэн ыытыллыбыт үлэлэри билиһиннэрдэ. Ити курдук, үөрэнээччилэр олоҥхону күргүөм толорууларынан үгүс дириҥ ис хоһоонноох олоҥхоҕо аналлаах дьоһун үлэ түмүктэннэ.
Олоҥхо баай тыла-өһө, үтүөҕэ-кэрэҕэ сирдиир ис хоһооно ыччат дьону сырдыкка угуйа, уһуйа туруохтун!
Валентина Кривошапкина, Таатта, Харбалаах.
keskil14.ru