Мин бүгүн олохпор аан бастаан Саха Өрөспүүбүлүкэтин Ил Дарханын Айсен Сергеевич Николаевы кытта көрсүһүүгэ сырыттым.
Быйылгы үөрэх дьылыгар “Кэскил” медиа-оскуолаҕа ситиһиилээхтик үлэлээммин Айсен Сергеевич Николаев пресс-конференциятыгар кыттыыны ылар чиэскэ тигистим. Олус эппиэтинэстээх тэрээһиҥҥэ барар буоламмын санаабын ууран туран бэлэмнэммитим.
Айсен Сергеевич саалаҕа киирэн баран, барыларын кытта истиҥник дорооболосто уонна “биһиги ортобутугар эдэрдэр баар буолбуттар” диэн “Кэскил” медиа-оскуола юнкордарын миигин уонна Олеся Турлакованы бэлиэтии көрөн, анаан дорооболосто.
Бу пресс-конференцияҕа өрөспүүбүлүкэ хаһыаттарын, телевидениетын, саайтарын салайааччылара, редактордара, суруналыыстара мустубуттар. Өрөспүүбүлүкэ олоҕор, сайдыытыгар сыһыаннаах ыйытыылары биэрдилэр.
Пресс-конференция икки чаастан ордук кэм устата буолла. Хас биирдии ыйытыыга Айсен Сергеевич олус чуолкайдык, күнүн-дьылын, сыыппаратыгар тиийэ чуолкайдык эппиэттиирин истэ олороммун улаханнык сөхтүм. Аны ыйытар дьон ааттарын-суолларын билэр, кинилэри кытта истиҥник кэпсэтэр.
Мин Айсен Сергеевич Николаевтан оҕо спордун билиҥҥитин уонна инники сайдыытын хайдах көрөрүн туһунан санаатын үллэстэригэр көрдөстүм. Онуоха Ил Дархан маннык хоруйдаата: “Оҕо спордун сайдыыта биһиги өрөспүүбүлүкэбитигэр – бренд. Бастакы Президеммит Михаил Ефимович Николаев көҕүлээһининэн, Саха сиригэр “Азия оҕолоро” спортивнай оонньуулар баар буолбуттара. Билигин “Азия оҕолоро” аан дойду таһымнаах оҕо спордугар күрэхтэһии биир саамай улахан түһүлгэтинэн буолла. Эһиил 2024 сыллаахха “Азия оҕолорун” Дьокуускай куоракка саамай үрдүк таһымнаахтык тэрийэн ыытыахпыт. Спорт бу улахан түһүлгэтигэр бэлэмнэнии үлэлэрэ билиҥҥэттэн саҕалаан ыытылла тураллар. Ол курдук спортивнай объектары оҥоруу, куорат тас көстүүтүн тупсарыы үлэлэрэ саҕаланнылар. “Азия оҕолоро” оонньууларга күрэхтэһиилэр спорт 24 көрүҥэр ыытыллыахтара. Саха сирин чиэһин икки сүүмэрдэммит хамаанда көмүскүөҕэ. Бэҕэһээ, бэс ыйын 6 күнүгэр, Саха Өрөспүүбүлүкэтин үөрэнээччилэрин Сайыҥҥы спартакиадаларын үөрүүлээхтик арыйдыбыт. Бу тэрээһин 2017 сыллаахтан ыытылла илик. Быйылгыттан саҕалаан спартакиада аны сылын аайы ыытыллар буолуоҕа. Бу барыта оҕо спордун сайдыытыгар улахан суолталаах түһүмэҕинэн буолар. Спартакиада кыттыылаахтара ааттаах-суоллаах спортсменнар, чемпионнар да буолан үүнэн тахсыбатахтарын иһин, саамай кылаабынайа биһиги доруобай, чэгиэн-чэбдик туруктаах ыччаты иитэн таһаарабыт. Чөл олоҕу тутуһар киһи өй-санаа өттүнэн баай, сайдыылаах буолар. Онон оҕо спордун өйөөһүн биһиги үлэбит биир суолталаах хайысхата”.
Айсен Сергеевич ыйытыыбар эппиэтин түмүктээри олорон: “Гаврил, эйиэхэ ситиһиилэри баҕарабын. Спордунан дьарыктан, үүнэн-сайдан ис! Мэҥэ Хаҥалас улууһун Төҥүлү курдүк үчүчгэй нэһилиэк дьиҥнээх гражданина буола улаат”, – диэн үтүө тылын анаата.
“Кэскил” медиа-оскуола юнкора, Дьокуускай куорат 5 №-дээх орто оскуолатын VII кылааһын үөрэнээччитэ, “Юность Севера” научнай-популярнай сурунаал «Эко-дело» биэриитин ыытааччыта Олеся Турлакова Айсен Сергеевичтан ыһыах туһунан ыйытта: “Айсен Сергеевич, сотору биһиги сөбүлүүр национальнай бырааһынньыкпыт ыһыах кэмэ кэлиэҕэ. Эһиги оҕо сааскытыгар төннөн, саамай умнуллубат ыһыах түгэнин туһунан ахтан ааһыаххыт дуо?”.
Ил Дархан Олесяҕа үчүгэй, үтүө боппуруоһун иһин махтанна. Уонна маннык эппиэттээтэ: “Мин уонна мин саасты көлүөнэ Сэбиэскэй Сойуус кэмигэр улааппыппыт. Оччолорго ыһыах оннук улаханнык уруйдаммат этэ. Ол гынан баран сорох улуустарга ыһыаҕы тэрийэллэр этэ, ол иһигэр мин төрөөбүт улууспар Үөһээ Бүлүүгэ. Ыһыах туһунан оҕо эрдэхпиттэн өйдөбүлүм – сайын кэллэҕинэ ыһыах хайаан даҕаны буолуохтаах диэн. Эһээм Андрей Титаров ыһыах үгэһин олус ытыктыыра, кинин кытта ыһыахха барсар этим. Билигин Туймаада ыһыаҕын национальнай бырааһынньыкпыт биир саамай бастыҥ тэрээһинин быһыытынан тэрийэн ыытабыт”.
Биһиги, “Кэскил” медиа-оскуола юнкордара, бүгүн Өрөспүүбүлүкэбит Ил Дарханын Айсен Сергеевич Николаевы кытта кылгас кэм иһигэр алтыһан аастыбыт эрээри кинини олус чугастык ылынныбыт. Биһиги ыйытыыларбытыгар ис сүрэҕиттэн кыһаллан туран эппиэттээтэ.
Өссө миэхэ итэҕэйэн, эрэнэн бүгүҥҥү пресс-конференция туһунан бэйэҥ санааҕын суруйаар диэн эппиттэриттэн ордук долгуйдум уонна төһө кыайарбынан бу суруйан түмүктээтим.
Гаврил ПРОКОПЬЕВ, “Кэскил” медиа-оскуола юнкора,
VII кылаас, Төҥүлү, Мэҥэ Хаҥалас.