Мин kesli14.ru саайка тахсыбыт «Е.П. Чехордуна: «Олоҕум тыына – олоҥхо» диэн сүрдээх улахан интервьюну сиһилии аахтым https://keskil14.ru/e-p-chehorduna-olo-um-tyyna-olo-ho/
Екатерина Петровна 80 сааһын туолбут олус улахан, ытыктабыллаах киһи эбит. Кини ситиспит ситиһиилэрэ, үлэтэ-хамнаһа дьоҥҥо-сэргэҕэ туһалыыр дьарыга сүрдээх киэҥ. Олох улуу киһитэ, Таатта киэн туттар киһитэ диэн сыаналаатым. Маннык улахан киһини кылгатан ойуулааһын уустук. Тоҕо диэтэххэ, Екатерина Петровна Чехордуна олус элбэх үтүөнү оҥорбут.
Екатерина Петровна оҕо сааһыттан ыла үлэҕэ-хамнаска, дьоҥҥо-сэргэҕэ бэриниилээх, күүстээх санаалаах киһи буоларын биллим. Кини дьон өйүн-санаатын тупсарыыга үтүө холобурунан, тирэҕинэн буолар дии санаатым.
Екатерина Петровна оҕо сааһа – саха олоҕун кэрэ көстүүтэ. Кини оҕо сааһа Таатта улууһун Тыараһа нэһилиэгин Мас Бүтэй диэн айылҕа кэрэтинэн арыаллаах сиргэ ааспыт. Дьиэлэрэ оскуола аттыгар турарынан, оҕолордуун, дьукаахтардыын элбэх киһи ортотугар улааппыт. Кини оҕо сааһыгар биир дьиэҕэ олорбут дьукаахтарын олох оскуолатынан ааҕар. Айылҕа ортотугар оонньоон-көрүлээн, айылҕалыын алтыһан дьоллоохтук улааппыт.
Төрөппүттэрэ холкуос туруу үлэһиттэрэ эбит. Оҕолорун көҥүллүк ииппиттэр. Ийэтинэн эһэтин киэҥ уһаайбатыгар, миэлиҥсэ аттыгар олорбуттар.
Оҕо сааһыттан биир түгэни кэпсээбитин сөбүлээн аахтым. Куоска дьиэтэ умайбытын туһунан нууччалыы хоһоону күнү быһа ааҕан, дьиэтээҕилэрин барыларын болҕомтолорун тардыбыт. Оччолорго кини кыра оҕо буолан, нууччалыы өйдөөбөт, арай ньиргиэрдээх дорҕооннору сөбүлээбит. Аҕата көтөҕөн ылан, бу тыллар ис хоһоонун өйдөтөн, оҕо үөрүүтүн соһуйууга кубулуппут. Ол түгэҥҥэ ийэтин сылаас илиитин уоскутар күүһүн билбит.
Екатерина Петровна, мин эйигин көрөн, кэпсэтэн билбэппин эрээри ис сүрэхпиттэн 80 сааскын толору туолбуккунан итиитик-истиҥник эҕэрдэлиибин! Уһун үйэлээх, дьоллоох буол диэн ис сүрэхпиттэн үтүө санаабын тиэрдэбин.
Лилия МАРКОВА, IX кылаас,
А.П. Илларионов аатынан Хайахсыт орто оскуолата, Чурапчы