Ахсынньы 6 күнүгэр оскуолабыт 110 сыллаах үбүлүөйүн үөрүүлээх тэрээһининэн бэлиэтээтэ. Араас сылларга үөрэммит оччотооҕу оҕолор бары мустан, ааспыт кэми ахтан-санаан, инники кэскилбитин түстүү, ситиһиилэрбититтэн үөрэн, биир сомоҕо буолан сиэттиспитинэн дьоро күммүтүгэр кэлбиттэрэ миигин олус үөртэ, соһутта.
Үбүлүөй бэлиэтинэн, үөрүүбүтүн өссө үрдэтэн, минньигэс торт киллэриитэ буолла. Бу торт – оскуолабыт баай историятын, ситиһиилэрин уонна кэскилин кэрэһилиир. Торду киллэрии үрдүк чиэс оскуолабыт бастыҥнарыгар тигистэ. Бары кэлбит ыалдьыттары соһутта. Элбэх киһи Хадаар оскуолатыгар үөрэммиттэринэн киэн тутталларын туһунан аһаҕас микрофоҥҥа үөрэн туран санааларын үллэһиннилэр.
Үбүлүөйдээх торду киллэрэр чиэс кимиэхэ тигистэ? Хоһуун ыччат бэлиэтэ. Оскуолабыт бэрэсидьиэнэ, бастыҥ активист, үчүгэй үөрэнээччи, элбэх оҕоҕо холобур буолар 11-с кылаас үөрэнээччитэ Саша Ксенофонтов. Норуот дууһатын кэрэһитэ. Чэпчэки атлетикаҕа Арассыыйа чемпиона, элбэх кэнпириэнсийэлэр кыайыылааҕа , бастын олимпиадник, уран уус, 10-с кылаас үчүгэй үөрэнээччитэ Айтал Григорьев. Дьулуур, кыайыы бэлиэтэ. Мас тардыһыытыгар Арассыыйа бастакы чемпиона, 9-с кылаас үөрэнээччитэ Петя Герасимов. Өй-санаа күүһүн кэрэһитэ. Арассыыйатааҕы «Инникигэ Хардыы» научнай-практическай кэмпириэнсийэ кыайыылааҕа, үөрэххэ-билиигэ тардыһыы холобура 8-с кылаас үөрэнээччитэ Эрсан Федоров.
Торду үөрүүлээхтик киллэрбиттэрин кэнниттэн, торду быһыы ытык быраап оскуолабыт дириэктэринэн таһыырыылаахтык үлэлээбит Василий Федорович Посельскайга, оскуолабыт билиҥҥи дириэктэригэр Петр Петрович Тарасовка уонна оскуолабыт бэрэсэдьиэнигэр Саша Ксенофонтовка бэрилиннэ.
Үбүлүөйдээх торт оскуолабыт кэскилин, үөрэнээччилэрбит, учууталларбыт ситиһиилэрин, күүстээх холбоһугун, кэлэр кэмҥэ эрэлин кэрэһилиир.
Сайаана ФЕДОРОВА, VI кылаас,
С.Д. Флегонтов аатынан Хадаар орто оскуолата, Чурапчы