Дүллүкүгэ бастакы медпуун 1942 с. аһыллыбыта. Онно фельдшеринэн Мария Михайловна Шалагина, санитарканан Мария Алексеевна Томская үлэлээбиттэр. Онтон 1958 сыллаахха балыыһа арыллан, бастакы бырааһынан Валентина Ивановна Новикова үлэлээбитэ.
Фельдшерскэй-акушерскай пууҥҥа билигин 2 медсестра, 1 лаборант, суоппар уонна санитарка үлэлии олороллор.Быйыл медсестра идэтин үөрэнэн бүтэрбит Светлана Николаевна Васильева фельдшер үлэтин толорон, ыарыһахтары көрөр, эмтиир.
-Светлана Николаевна, «Доруобуйа» национальнай бырайыак чэрчитинэн биһиги нэһилиэкпитигэр туох үлэ ыытылларый?
-Бу бырагырааманан балыыһабыт лабораториятыгар анаалыс оҥорор саҥа аппараттар кэлбиттэрэ.
-Диспансеризацияҕа нэһилиэнньэ ханнык араҥата хабылынна? Туох түмүктэрдээҕий?
-Диспансеризацияны билигин нэһилиэнньэ 80% ааста. Сыл иһигэр бары толору 100% ааһыахтаахтар. Көрдөбүт дьону доруобуйаларын туругунан көрөн учуокка туруорабыт, эмтиибит.
-«Земский доктор» программа Дүллүкүгэ үлэлиир дуо?
-2010 сыллаахха терапевт быраас Александра Михайловна Чомчоева үлэлии кэлбитэ. Кини билигин уоппускаҕа олорор.
—«Мобильный доктор» бырайыак Дүллүкүгэ үлэлиир дуо?
-Улуус кииниттэн быраастар оҕолору, улахан дьону көрө сыл аайы диспансеризацияҕа кэлэллэр.
-Бу сылга көһө сылдьар флюорограмма нэһилиэктэн төһө киһини хапта?
Сыл аайы кэлэн нэһилиэнньэни түһэрэн барар флюорограмма аппарата алдьанан, быйыл кэлбэтилэр. Онон дьон улуус киинигэр киирэн түстэ.
-Былырыыҥҥы сылы кытта тэҥнээтэххэ, демография боппуруоһа хайдаҕый?
-2024 сылга — 11 оҕо, 2025 сылга — 12 оҕо төрөөбүтэ. Бу сылга киирэн баран кулун тутар ыйга 1 оҕо күн сирин көрдө.
-«Активное долголетие» бырагыраама хайдах үлэлиирий?
-Нэһилиэнньэҕэ профилактическай бэсиэдэлэри ыытабыт. Оптуорунньук аайы улууспутугар «Доруобуйа күнэ» ыытыллар. Бу күн нэдиэлэ аайы спортзалга араас дьарык буолар.
—Босхо эминэн хааччыйыы бырагыраамата хайдах ыытылларый?
-Сүрэх, сахарнай диабет, о. д. а. ыарыынан учуокка турар дьоммут босхо эминэн кэмигэр хааччыллаллар.
—ФАП үлэһиттэрэ улуустааҕы, нэһилиэктээҕи спортивнай тэрээһиннэргэ медицина өттүнэн кыттыы хайдах тэриллэрий?
-Нэһилиэкпитигэр, улууска сыллата тустууга, чэпчэки атлетикаҕа, атын да көрүҥнэргэ күрэхтэһиилэр буолаллар. Онно балыыһаттан быраас, медсестра баран үлэлииллэр.
-Светлана Николаевна, ыйытыыларбар эппиэттээбиккэр махтал!
Степанида Варламовна Тимофеева, 30-тан тахса сыл балыыһаҕа лаборанынан үлэлиир. Кини лаборатория үлэтин туһунан кэпсээтэ:
— 1997 сылтан лабораторнай сулууспаҕа үлэлиибин. Медосмотр ааһар улахан дьон, оҕолор уонна көрдөрүнэр дьон анаалыстарын оҥоробун: биохимия, хаан уопсай анаалыһын, гемостаз уо.д. а. Үксүн микроскобунан үлэлиибин. Сүрэҕэ ыалдьар, оҕо күүтэр, дабылыанньалаах дьон анаалыһын гемостаз аппаратыгар көрөбүн. Онон дьон улуус киинигэр барбакка, манна анаалыстарын ааһан көрдөрүнэллэр. «Доруобуйа» национальнай бырайыагынан хас да аппарат кэлбитэ. Онон олоҕу кытта тэҥҥэ сайдан иһэбит. Улуус кылаабынай бырааһа Сардаана Николаевна Павлова, лаборатория сэбиэдиссэйэ Айталина Прокопьева тыалары аппаратынан хааччыйан олороллор. Урут илиинэн оҥорор буоллахпытына, үлэбит чэпчээтэ. Анализ түмүктэрэ күн аайы компьютерга киирэ тураллар. » РТМИС» программанан үлэлиибит, — диэн аппараттарын көрдөрөн, быһааран сиһилии кэпсээтэ.
Дүллүкүтээҕи ФАП бэйэтин кыаҕынан нэһилиэнньэни көрөн, эмтээн олорор. Фельдшер суоҕа үлэҕэ уустуктары үөскэтэр. Ыаллыы Хомустаах нэһилиэгиттэн нэдиэлэҕэ биирдэ фельдшер Елизавета Константиновна Анисимова кэлэн ыарыһахтары көрөн барар. Сотору бырааспыт үлэтигэр таҕыстаҕына, бу кыһалҕа быһаарыллыа.Сиһилии видеоҕа көрүҥ:
Сааскыйа Васильева, 10 кылаас, «Эрчим» медиакиин, Дүллүкү, Үөһээ Бүлүү.