Хотун Бүлүү туонатыгар Түгэхтэй ытык сиригэр киэһэ 10 чаастан олоҥхо түһүлгэтин аһыллыытын үөрүүлээх сиэрэ-туома буолла. «Үөһээ Бүлүү улууһа» муниципальнай оройуон Баһылыга Владимир Семёнович Поскачин эҕэрдэ тылын эттэ, бар дьонугар алгыһын анаата.
Ытык ыһыах маанылаах ыалдьыта, Саха Республикатын Ил Түмэнин бэрэссэдээтэлин бастакы солбуйааччы, Саха Республикатын Ил Дарханын иһинэн Национальнай Олоҥхо комитетын бэрэссэдээтэлэ Александр Николаевич Жирков уонна өрөспүүбүлүкэтээҕи «Олоҥхо Ассоциацията» общественнай тэриллии бэрэссэдээтэлэ Февронья Васильевна Шишигина бар дьонноругар алгыстарын анаатылар.
Олоҥхо түһүлгэтэ төрүттэммитинэн үөрэн-көтөн туран ӨРӨГӨЙ оһуохай буолла.
Олоҥхо ыһыаҕын икки Моҕол ураһаларыгар, оҕо олоҥхолуур балаҕаныгар, күргүөмүнэн толоруллар олоҥхо түһүлгэтигэр олоҥхоһуттар үс түүннээх күн толору туолуор диэри олоҥхо кэрэ эйгэтигэр киллэриэхтэрэ, улуу куйаар устун умсулҕаннаах айаҥҥа көтүтүөхтэрэ. Үгүс улахан дьон, 35 саастарыгар диэри 30 киһи, 28 кырачаан олоҥхоһут олоҥхону өрө көтөҕүөхтэрэ.
Кристина Иванова