Мукучуга олунньу 16 күнүгэр «Дайан» сынньалаҥ киинигэр А.Д.Макарова аатынан култуура уонна ускуустуба кэллиэһин IV курсун устудьуона Сергей Гаврильев, П.А.Ойуунускай төрөөбүтэ 130 сылыгар анаан, «Дьулуруйар Ньургун Боотур» олоҥхо тутулугар олоҕуран «Олоҥхо ойуута» оскуола оҕолоругар театральнай күрэх көрүҥүнэн ыытыллар отчуоттуур туруоруутун астына көрдүбүт.
Кыттыыны ыллылар: Н.П.Егоров аатынан Мастаах, И.Е.Левин аатынан Танара орто оскуолаларын, Мукучутааҕы гимназия үөрэнээччилэрэ, «Дэриэбинэчээн» тыйаатыр артыыстара. Бастакынан, ыалдьыттарбыт, Мастаах оскуолатын оҕолоро (салайааччы С.Жакипова) олоҥхоттон быһа тардыыны эт куоластарынан ыллаан — туойан, кэпсээн — ипсээн көрдөрдүлэр. Иккиһинэн, олохтоох оскуола, гимназия үөрэнээччилэрэ «Дайан» сынньалаҥ киинин, норуот театрын артыыстара олоҥхону аныгылыы уоттаан-күөстээн, буруолаан-тараалаан, тыастаан-уустаан туруордулар. Абааһыларбыт сыанаттан ойон түһэн сырыттылар.
Дьүүллүүр сүбэ быһаарыытынан 1 миэстэни Мастаах оскуолатын олоҥхоһуттара ыллылар.
Иккискэ олохтоохтор холбоһуктаах хамаандалара тигистэ. «Бастыҥ дьахтар» оруола ааты Д.Михайлова, Танара оскуолата. » Бастыҥ эр киһи оруола» — С. Волков, Мукучу гимназията.»Бастыҥ тойуксут» ааты Мастаах Туйаарыма Куота — Ю.Михайлова ылла. Аллараа дойду дьоруойдарын оонньообут С.Айтал,И.Харысхан анал бириискэ тигистилэр.
С.Волков олоҥхо киэһэтин сонун арыйыытынан ааттаныан ааттана. «Бу хайаларын оҕотой? саҥарара уратытын, оруолун кыайа тутарын… «- диэн сэргии олордубут. Маны таһынан,
«Бастыҥ сыана көстүүмэ»(Мастаах), «Бастыҥ музыканан киэргэтии (Мукучу) — анал бириистэр туттарылыннылар.
Устудьуон Сергей Гаврильев быраактыкатын «Дайан» сынньалаҥ киинин үлэһитэ И.Н.Находкина салайбыт. Ыйы быһа эрчийэн,сыралаһан туруорбуттар. Маныаха көмөлөспүт, өйөөбүт дьонунан буолаллар: Мукучу нэһилиэгин баһылыга Н.И.Левин,модельнай библиотека сэбиэдиссэйэ И.Н Им.,ИП — Ксенофонтов П.П.,Николаева Т.И., «Дайан» сынньалаҥ киинэ.Кинилэргэ анаан С.Гаврильев үрдүк сыанаттан дириҥ махталын тириэртэ. Түмүккэ, «Хаһан да буолбатах» туруорууну көрдүбүт, ураты талааннаах оҕолор баалларын бэлиэтээн эттэ — театр режиссера С.Е.Иванова.
Сарсын үҥкүү салаатыгар үөрэнэр устудьуон А.Павлов отчуоттуур кэнсиэрин көрөөрү оҥосто сылдьабыт. Биһиги суруйуубутун көтүтүмэҥ!
«Арылы» — пресс-бөлөх
Кэбээйи улууһа, Мукучу.