Саха сирин үөрэҕин, култууратын министиэристибэтин, Саха Өрөспүүбүлүкэтин Национальнай библиотеката, М.К. Аммосов аатынан ХИФУ Олоҥхо научнай-чинчийэр үнүстүтүүтэ, Олоҥхо тыйаатыра, Саха Өрөспүүбүлүкэтин Олоҥхо ассоциацията көҕүлээһиннэринэн сэтинньи 21-26 күннэригэр Олоҥхо декадатынан биллэрдилэр.
РФ Бэрэсидьиэнэ В.В. Путин Ыйааҕынан биллэриллибит РФ Норуоттарын култуурунай нэһилиэстибэлэрин сылын чэрчитинэн, Саха АССР төрүттэммитэ 100 сылынан, Олоҥхо национальнай күнүгэр аналлаах өрөспүүбүлүкэтээҕи декада чэрчитинэн Ийэ тыл барҕа баайын иҥэриммит олоҥхо тылын-өһүн таба суруйар үөрүйэҕи олохсутар-иҥэрэр, итиэннэ олоҥхо ис хоһоонун нуучча тылынан киэҥ араҥаҕа билиһиннэрэр сыаллаах «Олоҥхо дьыктаана» аахсыйа ыытыллар.
Аахсыйаҕа сааһыттан, идэтиттэн уонна үөрэҕиттэн тутулуга суох баҕалаах барыта кыттыан сөп. Дьыктааны суруйууну улахан дьоҥҥо – библиотека үлэһиттэрэ; үөрэнээччилэргэ, устудьуоннарга – үөрэх, култуура тэрилтэлэрэ тэрийэллэр.
Ороһу нэһилиэгин олохтоохторо эмиэ туора туран хаалбакка, акцияҕа көхтөөх кыттыыны ыллылар. Сэтинньи 23 күнүгэр сабыс-саҥа мас сытынан дыргыйар саха балаҕаныгар, олоҥхо тылын-өһүн билиилэрин таһымын билээри тоҕус киһи муһунна. Бу сырыыга дьыктаан тиэкиһэ Платон Алексеевич Ойуунускай «Дьурулуйар Ньургун Боотур» олоҥхотуттан быһа тардыы буолла.
Дьыктаан суруйан баран, акция кыттыылаахтарын итии чэйинэн, алаадьынан күндүлээтилэр, ону тэҥэ Арктикатааҕы судаарыстыбаннай култуура институтун устудьуона Алексей Руфов «Дьурулуйар Ньургун Боотур» олоҥхоттон быһа тардан ааҕан улахан сэҥээриини ылла.
Дьыктаан бэрэбиэркэтин түмүгүнэн бастыҥ үлэлээх: Петр Романович Романов, Екатерина Константиновна Котоконова, Раиса Алексеевна Васильева, Таисия Петровна Павлова, Сардаана Николаевна Васильева буоллулар.
Акцияҕа көхтөөх кыттыыны ылбыт дьоммутугар барҕа махталбытын тиэрдэбит уонна өрүүтүн да бу курдук сахаҕыт тылын өрүү инники күөҥҥэ илдьэ сылдьаргытыгар баҕарабыт!
Жанна ИВАНОВА,
И.Е. Иванов-Уйбаан Ороһуунускай аатынан модельнай
библиотека сэбиэдиссэйэ, Ороһу нэһ.