Оҕолор, ордук уһуйаан, алын кылаас оҕолоро остуоруйалары ааҕарбытын, көрөрбүтүн сөбүлүүбүт. Мин үһүс кылаастан «Иэйиэхсит» оҕо бөлөҕөр сылдьабын. Бөлөхпүт иһинэн тэриллибит «Доҕордуулар» диэн куукула тыйаатырыгар икки сыл дьарыктаммытым.
Орто сүһүөх кылааска тахсан баран тыйаатыр куруһуогар сылдьабын. Быйыл нуучча остуоруйатын «Бөтүүкчээн» диэн остуоруйаны бэлэмнээн салайааччыбыт Нина Никитична Михайлова, Уйбаан Ороһуунускай аатынан модельнай библиотека сэбиэдиссэйэ Жанна Семёновна Иванова «Оллоонноон олорон остуоруйалаһыах» бырайыактарын Гаврил Николаев аатынан сынньалаҥ киин дириэктэрэ Анна Артуровна Иванова көҕүлээһининэн улууска иккис төгүлүн ыытыллар остуоруйа бэстибээлигэр кытынныбыт. Остуоруйабытыгар Д.Е. Иванов-Артыыс Миитэрэй аатынан норуот тыйаатырын режиссера Розалия Леонидовна Акимова көмөлөстө.





Бэстибээлгэ Оҥхой, Дүллүкү, Хоро тыйаатырын куруһуогар дьарыктанар оҕолор кэлэн кытыннылар. Көрүү түмүгүнэн, Оҥхойтон «Кэскиллэр» Шарль Перро «Кыһыл Бэргэһэчээн» (салайааччы Мария Гаврильевна Васильева) Кылаан кыайыылаах аатын ылан, 10000 солк. харчынан, көһө сылдьар кубогынан, «Иэйиэхсит» — 1 миэстэни, (7000), Дүллүкү «Дьэргэлгэн» Мария Федотова-Нулгынэт «Биэс быраат тарбахтар» (салайааччы Александра Николаевна Иванова) — 2 миэстэ (5000 солк), икки үһүс миэстэ бэрилиннэ Дүллүкү Антуан де Сент- Экзюпери «Кыра Тыгын» Елена Слепцова-Куорсуннаах бөрөбүөтүнэн остуоруйаҕа (салайааччы Наталья Матвеевна Степанова) уонна Хоро «Сэһэн-тэптэл» Алексей Толстой «Буратино мүччүргэннээх сырыылара» (салайааччы Анна Ефимовна Назарова) иккиэннэригэр үстүү тыһыынча харчы.
Улуус иһинэн иккис төгүлүн ыытыллыбыт остуоруйа бэстибээлигэр кыттыбыттар бэйэ-бэйэбит остуоруйаларбытын көрөн элбэххэ үөрэннибит. Кэлэр 2025 сылга үһүс төгүлүн Оҥхойго ыытыллар бэстибээлгэ үөрэ-көтө көрсүөх буолан тарҕастыбыт.
Эвелина Бюлтясова, Ороһу, Үөһээ Бүлүү.
keskil14.ru