Ньурба оройуонун Н.И. Кочнев аатынан I-Хаҥалас орто оскуолатын 11 кылааһын туйгун үөрэнээччитэ Олеся Петрова быйылгы Ил Дархан Харыйатыгар барар үрдүк чиэскэ тигистэ. Олеся маҥнайгы кылаастан туйгуннук үөрэнэр, оскуоланы бүтэрэригэр көмүс мэдээл ылаары сылдьар. Кини «ЫЛЛЫК» эдкорпост чилиэнэ, элбэх өрүттээх, араас дьоҕурдаах, талааннаах кыыс.
Сылын аайы араас олимпиадаларга, научнай конференцияларга, куонкурустарга ситиһиилээхтик кыттар. Кини обществознаниены, нуучча тылын, литературатын уонна историяны ордук сөбүлээн үөрэнэр. Инники идэтин кытта дьүөрэлээн эбии дьарыктарга, куонкурустарга тиһигин быспакка кыттар.
Үс көлүөнэ учуутал дьиэ кэргэнигэр төрөөбүт буолан, Олеся кинигэ ааҕарын олус сөбүлүүр, бэйэтэ дьиэтигэр бибилэтиэкэлээх. Нуучча, аангылыйа классика литературатын ордук сөбүлээн ааҕар. Ньурба оройуонугар ыытыллыбыт “100 фактов о Нюрбе” куонкуруска бастакы миэстэ буолбута. Былырыыҥҥы өрөспүүбүлүкэтээҕи «WorldSkills» “Коммуникабельность” көрүҥүгэр кыттыыны ылбыта, араас сочинение куонкурустарыгар өрүүтүн миэстэлээх буолар. Кини «ЫЛЛЫК» эдкорпост чилиэнэ, матырыйаал наада диэн тиэмэтэ этилиннэҕинэ, тутатына суруйар эдэр кэрэспэдьиэн.
Олеся кыра эрдэҕиттэн тенниһынан утумнаахтык дьарыктаммыта. Араас күрэхтэһиилэргэ ситиһиилээхтик кыттар. Билигин оскуола волейбол, баскетбол хамаандаларын солбуллубат хапытаана. «Патриот» кулуупка дьарыктанар буолан строевой хаамыыны, аптамаат ыһыытын-хомуйуутун дьэҥкэтик билэр, сатыыр. «Оҕолор кыра эрдэхтэриттэн ситиһиилээх буолар сыалтан элбэхтик, утумнаахтык дьарыктаныахтарын, үлэлиэхтэрин наада, туох барыта дьаныардаах үлэттэн тахсар. Сыаллаах буолуҥ уонна онно талаһан, иннигит диэкки толлубакка баран иһиҥ!», — диэн этэр.
Биһиги киэн туттар туйгун үөрэнээччибит Олеся Петрова өссө да оскуолатын, төрөөбүт дойдутун аатын ааттата туруо диэн эрэнэ саныыбыт уонна киниэхэ инникитин өссө да үрдүктэн үрдүк ситиһиилэри баҕарабыт!
Наталия Жданова, «ЫЛЛЫК» эдкорпост, Хаҥалас, Ньурба улууһа.