Биһиги историяттан билэрбит курдук, Таатта чулуу уола Платон Алексеевич Ойуунускай, Саха автономиятын төрүттээччилэртэн биирдэстэрэ, общественнай диэйэтэл, поэт, суруйааччы, «Дьулуруйар Ньургун Боотур» олоҥхо ааптара эрэ буолбакка, ону таһынан кини Саха спордун көрүҥнэрэ сайдарын туһугар күүскэ үлэлээбит киһинэн буолар. Ойуунускай ааспыт үйэ XX-с сылларыгар физкультура сэбиэтигэр уонна Саха АССР спордун Киинигэр салайааччылаабытын биллим, ону тэҥҥэ физкультура хамсааһынын тэрийсибит эбит. Онон кини сыралаах үлэтэ сүппэтин-симэлийбэтин туһугар кырдьаҕастан мындырын ылан, өссө кэлэр кэнэҕэски кэскилгэ өйдөтөн, салҕаан тэнитэрбит ирдэнэр.
Бүгүн, от ыйын 9 күнүгэр, Таатта ытык сиригэр, П.А.Ойуунускай биһигин ыйаабыт алааһыгар көрсүһүү буолла. Бу көрсүһүү «Манчаары оонньууларын» чэрчитинэн ыытылынна. Өбүгэлэрбит оонньуулара сайда-чэчирии туралларын, норуоппутун сайыннаралларын уонна аатырдалларын туһугар диэн суолталаах «»Дьулуруйар Ньургун Боотур» уонна «Боотурдар көлүөнэлэрэ» Преемственность поколений: от героического эпоса олоҥхо до спортивных Игр Манчаары — поколение боотуров» диэн Александр Николаевич Ким-Кимэн саҥа кинигэтэ сүрэхтэннэ.
А.Н.Ким-Кимэн — «Сахаада-спорт» Ассоциациятын президенэ, РСФСР уонна Россия успуордун маастара, юридическай наука дуоктара, профессор. Ону кытта бүгүҥҥү кэпсэтиигэ кыттыыны ыллылар: Таатта улууһун баһылыга Айаал Семенович Бурцев, Баһылай Манчаары аатынан «Модун» өрөспүүбүлүкэтээҕи успуорт төрүт көрүҥнэрин Киинин дириэктэрэ Геннадий Анатольевич Васильев, күрэс бэтэрээнэ, Олимпийскай чөмпүйүөн Павел Павлович Пинигин, боксаҕа Европа 2 төгүллээх чөмпүйүөнэ, аан дойду чемпионатыгар үрүҥ көмүс үрдэллээх Василий Михайлович Егоров уо. д. а.
Платон Ойуунускай төрөөбүт балаҕаныгар киирэн алгыстаах алаадьынан, сыалаах саламаатынан көмүлүөк оһох аһатылынна. Александр Николаевич ытык дьоҥҥо буруолуу сылдьар кинигэлэрин уонна Саха сирин сайдыытын туһунан бэйэтин ыстатыйатын бэлэх уунна, тус санааларын ыйытта.
Ыалдьыттар бу саҕаламмыт күрэс төрүт көрүҥнэригэр XXII «Манчаары оонньуулар» суолтатын, кэскилин ырытыстылар. Мустубут дьон бары саха төрүт көрүҥнэрин оҕолорбутугар уһуйан салгыахха наадатын сүрүн санаа быһыытынан бэлиэтээтилэр.
Мария Сибирякова, 11 кылаас, С.К. Макаров аатынан Чурапчы гимназията, «Кэскил» оҕо медиа киинин эдэр кэрэспэдьиэнэ