Биһиги санаабытыгар, ОГЭ, ЕГЭ туттарар оҕоҕо төрөппүт көмөтө улахан суолталаах. Ийэ, аҕа истиҥ сыһыана, дьиэ кэргэн эйгэтэ оҕо бэйэтигэр эрэлин күүһүрдэр. Онтон бэйэтигэр эрэллээх оҕо “дух-дах”, сыыһа-халты туттубат. Төрөппүт оҕотун “хайдах өйдөөбөккүнүй” диэн сирэй-харах анньыбакка, кутун-сүрүн баттаабакка, төттөрүтүн сүбэлээн-амалаан, эрчимирдэн биэрэрэ ордук.
Оҕолор күннээҕилэрин былаанныырга ыарырҕаталлар. Онно көмөлөһүөххэ наада. Төрөппүттэр предметник учууталлары кытта элбэхтик көрсөн, сүбэ-ама ылыахтаахпыт. Бу оҕоҕо, үөрэтэр учууталга икки өттүттэн туһалаах, көмөлөөх.
ОГЭ, ЕГЭ туттарыы оҕо биир саамай эппиэтинэстээх кэмэ буолан, ыксыыр, ыгылыйар, долгуйар, куттанар. Онуоха оҕо ис санаатын, туругун өйдөөн, төрөппүт оҕотун аттыгар баара киниэхэ улахан күүс-көмө буолар дии саныыбыт.
Лидия Григорьева, Аида Прокопьева, Мария Ноева,
С.Д. Флегонтов аатынан Хадаар орто оскуолатын төрөппүттэрэ, Чурапчы