Билигин олохпутугар араас интэриэһинэй, умсугутуулаах дьарыктар бааллар. Олортон биирдэстэрэ, сүрэхпиттэн талар, дууһабын уоскутар дьарыгым – оҕуруо тиһиитэ. Бу дьарык мин олохпор хайыы-сах бөҕө миэстэни ылар, кыра эрдэхпиттэн бииргэ арыаллыыр.
Мин оҕуруо тиһиитинэн өссө 5-с кылаастан дьарыктанан саҕалаабытым. Ол кэмҥэ саамай судургу, кыра ытарҕалартан саҕалаан, уус-уран эйгэҕэ үктэммитим. Бу дьарык миэхэ олус кэрэхсэбиллээх этэ, араас өҥнөөх кыырпахтар күүстэринэн тугу эрэ айарга, оҥорорго баҕа санаам күүһүрбүтэ.
Билигин мин сатабылым өссө сайдан, улахан, ураты оҥоһуктары оҥорор буоллум. Холобур, сэҥээрэн акриловай оҕуруонан араас суумкалары оҥоробун. Бу суумкалар бэйэлэрэ туспа истииллээх, кэрэ көстүүлээх буолан, дьону олус үөрдэллэр. Кинилэр хас биирдии тигиилэрэ, тиһиилэрэ мин сүрэҕим сылааһын, дууһам уотун иҥэринэ сылдьар курдуктар.
Ону таһынан, дьон көрдөһүүтүнэн, араас бырааһынньыктарга, ордук Саҥа Дьылга, харыйаҕа шар оонньуурдары оҥоробун. Хас биирдии шар – туспа уус-уран айымньы, киниэхэ дьон баҕа санаалара, үөрүүлэрэ иҥэр. Закаасчыттар баҕа санааларын учуоттаан, оҥоһуктарбын саамай үчүгэйдик оҥоро сатыыбын.
Оҕуруо тиһиитэ миэхэ догор буолбута ыраатта. Бу мин олоҕум биир тирэҕэ, дууһам аһымала. Оҕуруо кыырпахтарыгар олох кэрэтэ, айымньылаах үлэ үөрүүтэ көстөр. Хас биирдии оҥоһукпар сүрэхпин-быарбын уурабын, ол иһин кинилэр ураты эниэргийэлээх, үтүө тыыннаах буолаллар. Бу дьарыгым салгыы сайдарыгар, өссө элбэх кэрэни, уратыны айыахпын баҕарабын
Алина ГАБЫШЕВА,
Үөһээ Бүлүү Ороһу орто оскуолатын 8 кылааһын үөрэнээччитэ