Биһиги оскуолабыт Сэмэн Новгородов аатын чиэстээхтик сүгэр. Оскуолабыт территориятыгар турар С.А. Новгородовка аналлаах өйдөбүнньүк паамытынньыкка Төрөөбүт тыл, сурук-бичик күнүгэр сибэкки дьөрбөтүн ууруутун церемонията буолла.
Манна оскуолабыт директора Надежда Васильевна Уарова, ветеран педагог Татьяна Кононовна Матвеева, быйылгы оскуолабыт выпускниктарын кылаастарын салайааччылара Дария Владимировна Назарова, Мария Николаевна Афанасьева, Василий Петрович Потапов уонна оскуолабыт лидерэ, 9 кылаас үөрэнээччитэ Никита Спиридонов кыттыыны ыллылар.
1892 сыллаахха олунньу 13 күнүгэр саха лингвист учуонайа Семен Андреевич Новгородов күн сирин көрбүт күнэ. 1996 сыл олунньу 9 күнүттэнСаха Өрөспүүбүлүкэтин бастакы президенэ Михаил Ефимович Николаев ыйааҕынан Семен Андреевич Новгородов төрөөбүт күнэ “Төрөөбут тыл, сурук-бичик күнүнэн” биллэриллибитэ. Сыл ахсын саха тыллаах бу күнү уруйдаан-айхаллаан көрсөр.
Улууска“Ийэ тылтан тирэнэн” декада чэрчитинэн, биһиги С. А . Новгородов аатын сүгэр, Чурапчы орто оскуолатын 915 үөрэнээччитэ, 82 педагога кыттыылаах,үгэс буолбут улахан оһуохай түһүлгэтэ үрдүк таһымҥа ааста. Сыл ахсын бу тэрээһин А. Федотов аатын сүгэр спортивнай комплекска ыытыллар.
Үөрүүлээх чааһыгар алын, орто кылаас уоланнара, оскуолабыт эр дьон учууталлара Сэмэн Новгородов, төрөөбүт тыл уонна төрөөбүт дойдубут Чурапчы туһунан хоһоон аахтылар.
Салгыы оскуолабыт директора Российскай Федерация үөрэхтээһинин бочуоттаах үлэһитэ, Саха Өрөспүүбүлүкэтин үөрэҕириитин туйгуна Надежда Васильевна Уарова, кини саха сахатынан кэрэтин, төрөөбүт тыл улахан суолталааҕын туһунан, С.А. Новгородов аатын биһиги оскуолабыт чиэстээхтик сүгүөхтээҕин, үрдүктүк ааттатыахтааҕын туһунан оҕолорго туһаайан кэс тылын эттэ. “Алгыс” үҥкүү бөлөх толоруутугар олус өрө көтөҕүүлээх “Дьиэрэҥкэй” үҥкүүнү көрдүбүт.
Онтон дьэ уопсай оһуохайга киирии буолла. Оһуохайы Туйгууна, Чэмэлиинэ Павловалар таһаардылар. Бу бииргэ төрөөбүт эдьиийдии-балыс кыргыттар биһиги “Дархан кыһата” оскуола 3 “д” уонна 4 “г” кылаас үөрэнээччилэрэ. А. Федотов аатынан спортивнай комплекс иһигэр саха норуота былыр-былыргыттан илдьэ сылдьар өрө көтөҕүүлээх, оһуохайа ньиргийдэ.
Ариана КУЛИЧКИНА, XI «в» кылаас,
Богдан СТЕПАНОВ, IX «в» кылаас, Аэлита СТАРОСТИНА, IX «г» кылаас,
С. А . Новгородов аатынан Чурапчы орто оскуолата, Чурапчы улууһа.