Атырдьах ыйын 9 күнүгэр аҕыйах ахсааннаах норуоттар Аан дойдутааҕы күннэрэ бэлиэтэнэр. Хоту дойдуга үлэттэн чаҕыйбат, үтүөҕэ-сырдыкка бүк эрэллээх үлэни өрө туппут дьон олорор.
Орто Халыма улууһун С.Н. Горохов аатын сүгэр Ойуһардаах орто оскуолата үлэ уонна сынньалаҥ лааҕырын (ЛТО) от оттооһунугар тэрийэн үлэлэппитэ номнуо 45 сыла.
Лааҕыр салайааччытынан оскуола киэн туттар бэтэрээн учуутала Петр Егорович Шкулев буолар.
Быйылгы оттооһун былааныттан 60 туоннаттан, бу күҥҥэ 48 туонна от оттоммут. Ол туһунан Ойуһардаах орто оскуолатын дириэктэрэ Марианна Жиркова иһитиннэрдэ.
— Оскуолабыт араас сылларга отун былаана 50 т-тан 200 туоннаҕа үрдүк хаачыстыбалаах оту оттоон кэллэ. Оскуола агропрофилированнай хайысхалаах. Ол курдук, 8 ыанар ынахтаахпыт, 6 ньирэйдээхпит, 4 былырыыҥҥы торбостоохпут. Сүөһүлэрбитигэр 60 туонна оту оҕолор, оскуола үлэһиттэрэ буолан бэлэмниибит. Оскуолабыт үөрэнээччилэрэ 5-тэн 11-с кылааска тиийэ бары көхтөөхтүк сылдьан оттууллар. Кыргыттар кыраабыллаах, уолаттар атырдьахтаах сылдьан үрдүк хаачыстыбалаах оту бэлэмнииллэр. Ким да үлэттэн туора турбат, бары бииргэ тутуһан күргүөмүнэн үлэлиибит.
Салгыы от үлэтин үгэниттэн Снежана Винокурова оҥорбут бэртээхэй видеотын көрүҥ:
keskil14.ru.