Бэһис кылаас үөрэнээччитэ Антон Голиков — номнуо республика аҕыс төгүллээх чөмпүйүөнэ. Кини Виктор Лебедев курдук биллиилээх тустуук буолуон баҕарар. Антон баҕа санаата туолуо диэн эрэниэҕиҥ уонна кинини кытта кэпсэтиибитин ааҕыҥ.
— Антон, бэйэҥ, дьонун-сэргэҥ туһунан кэпсии түс эрэ. Билигин ханнык оскуолаҕа, хаһыс кылааска үөрэнэҕин?
— Дорооболоруҥ. Мин Антон Голиков диэммин. Талах курдаах Таатта уола буолабын. Ытык Күөл нэһилиэгэр 2008 сыллаахха балаҕан ыйын 8 күнүгэр төрөөбүтүм. Уһуйааҥҥа Тааттаҕа сылдьыбытым, онтон оскуолаҕа киирэрбэр дьонум Дьокуускай куоракка көһөн кэлбиттэрэ. Билигин 17№-дээх оскуолаҕа 5 кылааска үөрэнэбин. Ийэм Надежда Александровна, аҕам Андриан Спартакович эмиэ Тааттаттан төрүттээхтэр.
— Ханнык спорт көрүҥүнэн дьарыктанаҕыный? Тоҕо атын көрүҥтэн ордордун?
— Маҥнайгы кылаастан тустууннан дьарыктанабын. Аҕам миигин үчүгэйдик тустаҕын диэн спорт бу көрүҥэр киллэрбитэ.
— Ханна дьарыктанаҕын? Тренердарын ааттара
— 3№-дээх ДЮСШ дьарыктанабын. Тренердарым Иннокентий Кочкин уонна Николай Яковлев, күн аайы эбиэттэн киэһэ, нэдиэлэҕэ алтата дьарыктыыллар.
— Спорду таһынан өссө туох сөбүлүүр дьарыктааххыный?
— Футболлуурбун ордоробун. Ону таһынан телефоммар социальнай ситимининэн доҕотторбун кытта оонньуубун.
— Ситиһиилэргин кэпсээ эрэ.
— Аҕыс төгүллээх республиканскай аһаҕас турнирдарга кыһыл көмүс мэтээл кэппитим, ону тэҥэ үстэ үрүҥ көмүс, иккитэ бронза.
— Саамай өйдөөн хаалбыт күрэхтэһииҥ?
— Маҥнайгы кыһыл көмүс мэтээли кэппиппин өйдүүбүн. Онно олус долгуйбутум.
— Кинигэни, хаһыаты төһө ааҕаҕыный?
— Иллэҥ кэммэр ааҕабын. «Спорт Якутии» сонуннарын уонна «Кэскил» хаһыакка бэйэм саастыы оҕолор ситиһиилэрин ааҕарбын сөбүлүүбүн.
— Холобур оҥостор киһиҥ? Ханнык биллэр спорсмены сэҥээрэҕиний?
— Олох кыра эрдэхпиттэн Виктор Лебедевы холобур оҥостобун. Ситиһиилэрин сэҥээрэбин, кини курдук буолуохпун баҕарабын.
— Улааттаххына туох идэтин баһылыаххын баҕараҕыный?
— Үчүгэйдик дьарыктанан, элбэх ситиһиилээх, Сахам сирин, Арассыыйа чиэһин көмүскүүр биллэр тустуук буолбут киһи диэн баҕа санаалаахпын.
— Бэйэн саастыылаах оҕолорго баҕа санаан?
— Баҕарыам этэ, үчүгэйдик кыһаллан үөрэниҥ, сөбүлүүр дьарыккытын көтүппэккэ күүстээхтик дьарыктаныҥ. Оччоҕо ситиһии син биир баар буолуоҕа.
Ааптар: Зинаида Григорьева
Хаартыска: Антон Голиков архыыбыттан