Бүгүн, ахсынньы 18 күнүгэр, бэчээт дьиэтигэр Арассыыйа Суруйааччыларын сойууһун чилиэнэ Ангелина Васильева – Дайыына «Аптаах таас» диэн орто сүһүөх кылаас оҕолоругар аналлаах кинигэтин сүрэхтэниитэ буолла.
Ангелина Васильева-Дайыына оҕо литературатыгар үктэммит аан бастакы кинигэтэ буолла. Кинигэҕэ дьоруойдар аптаах тааһы көрдүү элбээктэр дойдуларыгар киирэллэр, кинилэр мүлчүргэннээх сырыылара кэпсэнэр. Оҕо саас сылыгар, саҥа дьыл саҕана аптаах, алыптаах айымньы тахсыбыта оҕо прозатыгар саҥа сүүрээни киллэрдэ.





«Алта» кинигэ кыһатын салайааччыта, поэт Зинаида Архипова кинигэ хайдах бэчээттэммитин маннык кэпсээтэ: — Руслан Федотов үбүлээһининэн, «Алта» кинигэ кыһатын көҕүлээһининэн оҕолорго проза айымньытын суруйуу литературнай куонкуруһа биллэриллибитэ. Онно барыта холбоон 20-тэн тахса киһи кыттыбыта. Күрэс уратыта – бүппүт айымньыны ылыы буолбакка, саҥа суруллан эрэр айымньыны көрүү этэ. Дьүүллүүр сүбэ суруйааччы тылын-өһүн, оҕоҕо төһө табыгастаах буолуоҕун көрөн-истэн баран кыайыылааҕы таһаарбыта. Сүрүн кыайыылаахха 500 тыһыынчалаах бириэмийэ туттарыллыбыта. Сыл аҥарын иһигэр саҕалаабыт айымньытын бүтэрэригэр кыах бэриллибитэ. Элбэх айымньы киирбитин биир үлэнэн түмүктээн кэбиһиэхпитин баҕарбатахпыт. Ол иһин 4 айымньыны талан «Офсет» типография хампаанньа өйөөн спонсорстватынан тахсар диэммит илии баттаспыппыт. Биир бастыҥнарынан Ангелина Васильева «Аптаах таас» диэн кинигэтэ буолбута. 5 тахсыахтаах кинигэттэн бастакынан тахсан сүрэхтэннэ.



Тэрээһиҥҥэ «Айыы кыһатын» оскуолатыттан үөрэнээччилэр кэлэн саҥа кинигэ туһунан бэйэлэрин санааларын, тугу баҕаралларын эбэн-сабан биэрдилэр. Эбии иккис чааһа тахсара буоллар диэн бэлиэтээтилэр.






Саха сирин Суруйааччылларын сойууһун бэрэссэдээтэлэ, поэт, публицист Гаврил Андросов: — «Билиҥҥи кэмҥэ саха литератугарытыгар оҕо литературата диэн өйдөбүл «күлүккэ түһэн турар кэмэ. Хас биирдии сонун ааптар саҥа кинигэтэ оҕо литературатын эйгэтэ кэҥииригэр үлэлэһэр, мэктиэлиир дьон баара үтүө сонун буолар. Бүгүн «Аптаах таас» кинигэ сүрэхтэнииитэ чахчы, аптаах хомуһунун киллэрэн, оҕо литературатын сайдыытыгар биир олук уурар үктэл таас буолуоҕа диэн эрэнэ саныыбын» — диэн санаатын үллэһиннэ.
Тэрээһиҥҥэ ааптары аймахтара, кэллиэгэлэрэ, суруналыыстар кэлэн эҕэрдэлээтилэр.

Ангелина Васильева – Дайыына, кинигэ ааптара:
— Туох санааттан кинигэни суруйдуҥ?
—Аныгы оҕону интэриэһиргэтэр, 10 саастаах оҕо тугу ааҕарый диэн санаааттан фэнтэзи жанрын талбытым. Ханна эрэ көтүтэн кэбиспэккэ, саха үһүйээнигэр олоҕуран сир анныгар олорор тииҥ курдук элбээк норуота баар диэн үһүйээн баар. Онно олоҕуран бу аныгы оҕолору кинилэр дойдуларыгар сырытыннарыахха диэн толкуйдаан таһаарбытым. Оҕолор иккис чааһын суруй диэбиттэригэр улахан толкуйга түстүм.
— Кинигэ оҕолору туохха үөрэтэрий?
— Кинигэ оҕолору доҕордоһууга, бэйэҕэ эрэллээх буоларга, ыксаллаах түгэҥҥэ доҕору быраҕан барбакка көмөлөһөргө үөрэтэр.