СӨ Үөрэҕин министиэристибэтин иһинэн оҕо сынньалаҥын тэрийэр тэрилтэлэри сүрүннүүр салаа иһитиннэриитинэн, бу сайын Саха сирин үрдүнэн 680 лааҕыр үлэлиирэ былааннанар. Саха-отдых-детей.рф диэн сайтка киирэн, төрөппүттэргэ аналлаах страницаттан ханнык докумуоннар ирдэниллэллэрин көрөн хомуйустаххытына, баҕалаах оҕо өрөспүүбүлүкэбит лааҕырдарыгар уонна Россия куораттарын сынньалаҥ кииннэригэр хабыллар кыахтаахтар.
Араас көрүҥҥэ арахсаллар
Сахабыт сиригэр баар сайыҥҥы лааҕырдар биэс көрүҥҥэ арахсаллар:
– куорат таһынааҕы оҕону чэбдигирдэр лааҕырдар;
– күнүскү бириэмэҕэ үлэлиир лааҕырдар;
– үлэ уонна сынньалаҥ лааҕырдара;
– оҕону чэбдигирдэр санаторнай лааҕырдар;
– тыаҕа хонуктаах лааҕырдар (балаакканан сылдьыы).
Лааҕырдар билигин улахан бэрэбиэркэни, хамыыһыйаны ааһа сылдьаллар. Көҥүллэрин, лицензияларын, ирдэбилгэ эппиэттииллэрин Роспотребнадзор, МЧС, ИДьМ курдук тэрилтэлэр көрөллөр. Бигэргэттэхтэринэ эрэ аһыллаллар. Өскөтүн лааҕыр программатыгар ханна эмэ айаннаах, уунан устан барыылаах (сплавтаах) буоллаҕына, маршруттарын барытын эрдэттэн биллэриэхтээхтэр, итиэннэ ол устан тиийэр сирдэригэр хайаан да төлөпүөн сибээһэ хабар буолуохтаах.
“Кэскилгэ” кэлиҥ
Дьокуускай таһынааҕы лааҕырдарга өрөспүүбүлүкэбит араас муннуктарыттан кэлэн сынньаныахтарын сөп.
Үөрэх министиэристибэтин өйөбүлүнэн үлэлиир “Кэскил” оҕону сайыннарар киин бэс ыйын 15 күнүттэн аанын тэлэччи аһар. Биир сезоҥҥа 110 миэстэ көрүллэр. Лааҕыр икки улахан спортивнай былаһааккалаах, икки олорор дьиэлээх, күҥҥэ түөртэ аһатар остолобуойдаах, үөрэнэллэригэр аналлаах кылаастардаах.
Бастакы смена – суруналыыстыка сайыҥҥы оскуолата. Бэс ыйын 15 күнүттэн от ыйын 5-гэр диэри. Бу сменаҕа оҕолор бэчээт, тэлэбиидэнньэ, араадьыйа эйгэтин кытта алтыһыахтара.
Тележурналистикаҕа Лена Керемясова салайааччылаах “Сэргэлээх” устуудьуйа “Күнчээн” уонна “Биһикчээн” биэриилэрин редактордара үөрэтиэхтэрэ, маастар-кылаастары ыытыахтара. Режиссёр Евгений Павлов уонна кини “Пластелин” устуудьуйата оҕолору киинэ эйгэтигэр сыһыарыахтара, бэйэлэрэ уус-уран киинэлэри устуохтара, монтажтыырга үөрэниэхтэрэ.
Иккис смена – “JuniorSkills” академия. От ыйын 9-29 күннэригэр. Манна оҕолор “WorldSkills” хамсааһыҥҥа кыттар туһугар элбэххэ үөрэниэхтэрэ. Ол курдук, робототехника уонна нейропилотирование, графическай дизайн, о.д.а. куруһуоктар ыытыллыахтара.
Үһүс смена – “Дьэрэкээн өҥнөөх оҕо саас”. Балаҕан ыйын 3 күнүттэн 24-гэр диэри. Бу смена сыала-соруга: оҕо талаанын, ис кыаҕын арыйыы, сытыы-хотуу, кыбыстыбат буоларыгар көмөлөһүү, общественнай олоххо угуйуу, лидердии хаачыстыбатын уһугуннарыы. Ол туһуттан ырыаһыт, продюсер, мелодист Антон Иванов салайааччылаах “Добун” устуудьуйа хас биирдии оҕону кытары дьарыктаныа, сыанаҕа толлубакка тахсан ыллыырга, конферансьелыырга үөрэтиэ.
“Кэскил” – үөрүү дьол уйата. Манна өрөспүүбүлүкэбит бары улуустарыттан бастыҥтан бастыҥ оҕолор кэлэллэр. Биир путевка сыаната – 22000 солк. Лааҕырга сылдьыан баҕалаах оҕолор билсэр төлөпүөҥҥүт: 8(4112)34-09-66.
“Сосновайга” сынньаныҥ
Сылы эргиччи үлэлиир “Сосновый бор” киин сайынын үлэтин үгэнэ буолар. Ол курдук, бу кэмҥэ түөрт сменаны үлэлэтэр былааннаах.
Бастакы смена түмүктэнэн, билигин “SPORTOWN” диэн смена буола турар. Бэс ыйын 29 күнүгэр диэри. Бу кэмҥэ Ил Дархан бирииһигэр спортивнай оонньуулар буолуохтара. Ол иһин бу сменаҕа спорка ситиһиилээх оҕолор кэлэллэр. Кыахтарын холонон көрүөхтэрэ.
Үһүс “Я – гражданин Мира” смена бэс ыйын 28 күнүттэн от ыйын 18 диэри үлэлиэҕэ. Бу сменаҕа сылын аайы ыытыллар норуоттар икки ардыларынааҕы ЮНЕСКО сайыҥҥы IV оскуолатын үөрүүлээх аһыллыыта буолуоҕа. 12 саастарыттан 17-гэр диэри саастаах оҕолор кыттыахтара. Атын дойдулартан ыалдьыттар кэлэллэрэ былааннанар. Хас биирдии кыттааччы научнай дакылааттаах буолуохтаах. Сайыҥҥы оскуола программата: омук тылын үөрэтэр учууталлар маастар-кылаастара, научнай куонкурустар, регионнар икки ардыларынааҕы “Всемирное наследие в руках молодых” НПК. Манна кэлбит оҕолор ангылычаан, ньиэмэс, француз, дьоппуон, кэриэй уонна кытай тылларын үөрэтэн барыахтара.
От ыйын 21 күнүттэн атырдьах ыйын 10-гар диэри “Моя Республика” диэн төрдүс смена үлэлиэҕэ. Манна үҥкүүнэн үлүһүйэр оҕолор кэлиэхтэрэ. Аныгылыы хип-хоп, вакинг, контемп, о.д.а. стиллээх үҥкүүлэргэ үрдүк үөрэхтээх хореографтар үөрэтиэхтэрэ. Быйыл бу смена кэмигэр “Танцующая Республика” диэн фестиваль бэһис төгүлүн ыытыллыаҕа. Лааҕыр оҕолоро онно кыттыахтара. Кыайыылаахтар сыаналаах бириистэринэн уонна “Океан” лааҕыр “Российский восход” сменатыгар барар путевканан наҕараадаланыахтара. Сиһилии билсэр төлөпүөҥҥүт:
8(4112)36-94-81.
Соҕурууҥҥулар
Бүтүн Россиятааҕы таһымнаах “Океан”, “Артек” курдук лааҕырдарга путевка ыларга оҕо улахан тургутууну ааһар.
Ол курдук, оҕо “Артекка” барыан баҕарар буоллаҕына, www.artek.org сайтка киирэн, онлайн-анкетаны толоруохтаах. Киирбит сайаапкалары сүүмэрдээн, үрдүк рейтиннээҕи талаллар. Ол иһин оҕо наар “4”, “5” сыанаҕа үөрэнэр, күрэхтэргэ, куонкурустарга ситиһиилээх буолуохтаах. Ону туоһулуур сертификаттара ирдэнэр.
Өскөтүн төрөппүттэр оҕоҕутун ханнык лааҕырга ыытаргытын быһаарына илик буоллаххытына, саха-отдых-детей.рф сайтка киирэн, өрөспүүбүлүкэ лааҕырдарын туһунан иһитиннэриини, ону тэҥэ улуустар уонна куорат үөрэхтэрин салааларын сайтарыгар киирэн, сайыҥҥы сынньалаҥ туһунан билсиэххитин сөп.
Төрөппүттэргэ туһаайан эттэххэ, сайыҥҥы сынньалаҥҥа оҕолоргутун ыытаргытыгар, бастакынан, оҕо сынньанарын тэрийэр тэрилтэ үлэлииргэ көҥүллээҕин туоһулуур докумуонун ирдииргитин, оҕоҕут куттала суох сылдьыытын мэктиэлиир усулуобуйа тэриллибитин билсэргит булгуччулаах. Итиэннэ страховканы оҥортороргут наадалааҕын өйдөтөбүт.