Сэтинньи ый 17 күнүгэр Хаптаҕай орто оскуолатын 8 кылаас үөрэнээччилэрэ сыллата ыытыллар улуустааҕы «Саамай ааҕар кылаас» күрэххэ кыттан кэллилэр. Бу күрэххэ кыттарга учууталлар Светлана Анатольевна Кокорева уонна Айталина Семеновна Егорова бэлэмнээтилэр. Учууталлар оҕолору кытта сүүрбэ айымньыны ааҕан, ырытан, бэлэмнээн оҕолор элбэҕи аахтылар, биллилэр.
Күрэх Майа сэлиэнньэтигэр ыытылынна. Күрэххэ кэлбит оскуолалары 2 бөлөххө араардылар. Биһиги оскуолабыт улахан оскуолалар бөлөхтөрүгэр киирэн күрэхтэстэ. Дьүүллүүр сүбэ бэрэссэдээтэлэ, улуустааҕы оҕо библиотекатын салайааччыта Татьяна Михайловна оҕолорго 20 айымньыттан 40 боппуруостаах брейн-ринг ыытта. Бу бөлөххө 6 оскуола билиилэрин тургуппуттарын түмүгэр, биһиги оскуолабыт хамаандата үһүс бириистээх миэстэни ылары ситистэ.
Күрэххэ оҕолор көхтөөхтүк кытыннылар. Быйыл өрөспүүбүлүкэҕэ Ааҕыы сыла буоларын быһыытынан, бу тэрээһин ол чэрчитинэн ыытылынна.
Валя СПИРИДОНОВА, «Кустук» медиа-студия, Хаптаҕай оскуолата.