Оскуолабытыгар Учутал күнүгэр аналлаах тэрээһиннэр буолан аастылар. Ол курдук активистар буоламмыт «Бастыҥнар» хамсааһыннарыттан «Благодарю» акцияҕа кыттан, учууталларбытыгар «Урок учителю» диэн кылаас чааһын ыыттыбыт.
Бу күннээҕи тэрээһиҥҥэ оҕолор учуутал буоламмыт уруоктары ыыттыбыт. Уруоктарга сыһыаннаах ураты сорудахтаах гынан оҥорбуппут. Хас биирдии оҕо предметтэринэн арахсан үөрэттилэр. Тэрээһин бүтүүтэ учуталларга бэйэбит оҥорбут сэмэй бэлэхпитин туттарбыппыт.
Аныгыскы күнүгэр солбуйук, үөрэнээччи учуутал быһыытынан буолар күнэ буолан ааста. Активистар өссө төгүл учуутал быһыытынан сатабылларын көрдөрөн оҕолору үөрэттилэр.
Тэрээһин кэнниттэн аҕа саастаах бэтэрээн учууталларбытын эҕэрдэлээн, сэмэй бэлэхпитин туттаран кэлбиппит.
Учуутал күнүнэн миигин үөрэппит учуталларбын — бастакы учуталбын Потапова Прасковья Николаевнаны, кылааһым салайааччытын, саха тылын уонна литературатын учууталын Борисова Надежда Семёновнананы, оскуола организаторын Романова Анна Афанасьевнаны, дириэктэр сүбэһитэ Леонтьева Саргылаана Прокопьевнаны ис сүрэхпиттэн эҕэрдэлиибин!
Миигин үөрэтэн-такайан, элбэх билиини биэрбиккитигэр уонна улаатыннаран таһаарбыккытыгар махталым муҥура суох. Куруук бу курдук оҕолору кытта үөрэ-көтө үлэлэһэн иһэргитигэр, үлэҕитигэр ситиһиилэри баҕарабын!
Лилия МАРКОВА, IX кылаас,
А.П. Илларионов аатынан Хайахсыт орто оскуолата, Чурапчы