Билэрбит курдук, аан дойду үрдүнэн үөрэх-иитии тутула араас. Хас биирдии судаарыстыба үөрэҕин эйгэтэ туспа уратылаах буолар. Россия үөрэҕин систиэмэтэ бэрт уһун кэмҥэ сайдан кэлбит устуоруйалаах, ураты тутуллаах. Мин санаабар, биһиги дойдубут үөрэҕин тутула олус табыгастаах.
Биһиги оскуолаҕа олоххо-дьаһахха наадалаах, билиибитин-көрүүбүтүн хаҥатарбытыгар туһаайыылаах бэридимиэттэри үөрэтэбит. Онон оскуоланы бүтэрэрбитигэр дириҥ билиилээх, тобуллаҕас толкуйдаах буолан тахсыахтаахпыт. Россия оскуолаларыгар БКЭ киирбитэ сөптөөх. Төһө да долгутуулаах буоллар, маннык эксээмэн наадалаах. БКЭ-ни үрдүк баалга туттардахха, сөбүлүүр үөрэххэ, ханнык баҕарар куоракка буор босхо үөрэниэххэ сөп. Мин билэрбинэн, атын дойдуларга үрдүк да, орто да үөрэхтэрэ төлөбүрдээх буолан турар. Онон мин санаабар, БКЭ биһиги инники олохпутугар олук уурар үктэл буолар. Уонна улахан эппиэтинэһи сүктэрэр.
Мин гимназиябын олус сөбүлүүбүн, хас күн ахсын саҥаттан саҥа билиини ылабын, араас үөрүйэххэ уһуйуллабын, дьоҕурбун сайыннарабын. Учууталлар уруоктарын олус интэриэһинэйдик ыыталлар, хас биирдии оҕону дьаныһан туран үөрэтэллэр. Тапталлаах гимназиям миигин олус элбэххэ үөрэтэр, дириҥ билиини биэрэр. Онон биһиги дойдубут үөрэҕин систиэмэтэ саамай сөптөөх, инники олохпутугар «далаһа уурар» дии саныыбын.
Ол эрээри үөрэҕи толору баһылыырга сөптөөх усулуобуйа баар буолуохтаах. Биһиги, Горнай улууһун Бэрдьигэстээх гимназиятын учууталлара, үөрэнээччилэрэ уонна төрөппүттэрэ, гимназиябыт дьиэтэ-уота эргэрбитинэн, бүгүҥҥү кэм ирдэбилигэр сөп түбэһэр саҥа дьиэ тутуллара, үөрэх тэрилинэн, оборудованиенан толору хааччыллара буоллар диэн баҕа санаалаахпыт. Гимназистар араас таһымнаах олимпиадаҕа, кэмпириэнсийэҕэ элбэх ситиһиилэнэллэрэ биһиги үөрэхпит кыһата элбэх үлэни ыытарын туоһуолуур. Саҥа дьиэ тутулуннаҕына, талааммыт, дьоҕурбут сайдарыгар өссө улахан тирэх буолуо этэ.
Виктория Агеева, «Ай-тал» пресс-кулууп эдкора.
Бэрдьигэстээх гимназията, Горнай.
