Үгэс быһыытынан «Түөлбэбитигэр» “ Biz`On” бизнес- инкубатор атыы-тутуу дьаарбаҥката нэдиэлэ ахсын ыытыллар. Бу сезон бүтэһик дьаарбаҥкатыгар, буоларын курдук, оҕолор бэйэлэрэ оҥорбут оҥоһуктарын, сувенирдарын, иһиттэрин, киэргэллэрин туруордулар. Маны таһынан, бэйэлэрэ астаабыт пирожнайдарын, бэйэлэрэ үүннэрбит оҕуруот астарыттан оҕурсууну, кабачогу атыылаатылар. Бизнескэ холонор оҕолор бэйэлэрэ эргиэн саҥа көрүҥүн киллэрэллэр. Ол курдук, Эрсан Реев “беспроигрышнай” лотерея оонньотон, син кыра да буоллар, 350 солк.курдук дохуоту киллэрдэ. Оҕолор оҥоһуктара атыыга хамаҕатык баран , бу да сырыыга үөрүүлэрэ үгүс.
Находкина Аля, 7 кылаас.
Биһиги оҕолорбутун бу сайын «Түөлбэ» оҕо киинигэр сырытыннардыбыт. Оҕолор олус диэн үчүгэй, интэриэһинэй, оҕону сайыннарар тэрээһиннэрдээх куруһуоктарга сырыттылар, сайыннылар. Үрдүк билиилээх, сайаҕас сыһыаннаах педагогтар оҕону үчүгэйгэ угуйалларын иһин улахан махталбытын тиэрдэбит. Үлэҕитигэр өссө даҕаны үрдүк ситиһиилэри!
Регина Викторовна Реева, төрөппүт.
