“Блогер диэн кимий?” диэн ыйытыыга билигин хас биирдии оҕо эппиэттиир кыахтаах. Блогер буолуу – ураты талаан. Дьон-сэргэ болҕомтотун тардар интэриэһинэй постары суруйар, күннээҕи олоҕуттан хаартыскалары, видеолары таһаартыыр кыах киһи аайы бэриллибэт. Бүгүн кинилэр баар буолан, биһиги олохпут чаҕылхай, сэргэх диэтэхпинэ, бука, сыыспатым буолуо. Ону тэҥэ оҕо үксэ блогер буолуон баҕарар. Сөбүлүүр дьоруойун үтүктэр, өрө тутар.
Артур Томскай, Дьокуускай 7 №-дээх орто оскуолатын V “В” кылааһын үөрэнээччитэ:
— Мин сааһым 12. Хас биирдии аныгы оҕо сиэринэн Интэриниэт ситимигэр Youtube ханаалга чаастатык киирэбин. Ли Сяо диэн Россия блогерын интэриэһиргээн көрөбүн. Кини дьиэтигэр саһыл иитэр. Ол туһунан кэпсиир. Мин кыыллары наһаа сөбүлүүбүн. Миэхэ дьиэбэр Лаки диэн ааттаах мэник-тэник ыттаахпын. Биһиги олус доҕордуубут. Киниэхэ туспа Инстаграм страницалаах. Ону тэҥэ компьютерга оонньуубун. “Nerkin” диэн блогер “Minecraft” диэн аатырбыт оонньуу туһунан дьоҥҥо кэпсиир. Мин итиннэ бэйэм виртуальнай эйгэбин тэрийэн оонньуубун. Олус элбэх дьиэлээхпин, замоктаахпын. Миллиардынан харчылаахпын. Өссө “Slivkishow” диэн лайфхактардаах страницаны сөбүлээн кэтиибин. Биири да боруобалыы иликпин да буоллар, олус туһалаахтар диэн бэлиэтиибин. “Mamix” диэн эксперементатор-блогер эмиэ олус интэриэһинэй ханааллаах. Кини олус өйдөөх буолан, физика эксперименнэрин оҥорор. Саха сирин блогердарыттан, хомойуох иһин, кими да билбэппин.
— Блогер диэн Интэриниэт нөҥүө сөбүлүүр дьарыгын туһунан атын дьоҥҥо кэпсиир киһи. Санаатын олус интэриэһинэйдик үллэстиэхтээх дии саныыбын. Оччоҕо эрэ элбэх сурутааччыланар.
— Мин 10 мөлүйүөнтэн кырата суох сурутааччылаах биллэр-көстөр блогер буолуохпун баҕарабын. Видео-оонньуулары олус сөбүлүүбүн. Ол иһин тус бэйэм видео-оонньууларбын айан таһаарыам этэ. Мин Twitter, Instagram, Youtube, Discord ситимнэринэн туттабын. Сайыҥҥы сынньалаҥ кэмигэр ийэм төһө көҥүллүүрүнэн, төһө баҕар олоруохпун сөп. Үөрэх кэмигэр барыта эрэсииминэн буолааччы.
Маша Оконешникова, Майатааҕы В.П.Ларионов аатынан орто оскуола V “А” кылааһын үөрэнээччитэ:
— Мин Instagram, Tik-Tok уонна Youtube көрөрбүн сөбүлүүбүн. Чуолаан рак ыарыы утары охсуһар күүстээх санаалаах Каришаны – @karishka.k.08, “Роблокска” оонньуур, интэриэһинэй, күлүүлээх видеолары устар Женяша Ларионованы – @jenyashayt, “Сute fox”, страницаларын ордорон көрөбүн. Бэйэм тик-тогунан үҥкүүлээн видеоҕа устабын уонна табаарыстарбын кытары үллэстэбин. Блогер буолуохпун олус баҕарабын. 100 тыһыынча сурутааччыланыам этэ. Лайки уонна Роблокс устуом этэ. Сотору кэминэн баҕа санаам туоларын туһугар кыра саҕалааһыннарбын оҥоруом. Билигин Интэриниэккэ оҕо интэриэһиргиирэ барыта баар. Блогердар олус киэҥ фантазиялаахтар. Хас күн аайы видео устан таһаарар эмиэ чэпчэкитэ суох үлэ буоларын өйдүүбүн. Мин төһө да итини барытын сөбүлээтэрбин ийэбэр көмөлөһөрбүн умнубаппын.
Толя Малышев, Чычымахтааҕы С.Р.Кулачиков-Эллэй аатынан орто оскуола VII кылааһын үөрэнээччитэ:
— Россия блогердарыттан Стас Давыдовы көрөрбүн сөбүлүүбүн. Кини Youtube ханаалга “This is Хорошо” диэн блогу ыытар, музыкант, путешественник, матасыыкылынан, бэлисипиэдинэн хатааһылыырын сөбүлүүр. Оттон Саха сирин блогердарын интэриэспинэн көрөбүнараас дьону көрөбүн. Блогер төһөнөн элбэх сурутааччылаах да оччонон биллэр-көстөр, ситиһиилээх. Арай, мин блогер буоларым буоллар үгүс интэриэһинэй ис хоһоонноох видеолары, хаартыскалары угуом этэ. Холобур, атын дойду дьонугар-сэргэтигэр Сахам сирин кэрэ айылҕатын билиһиннэриэм этэ. Ол туризм сайдарыгар туһалыа этэ дии саныыбын.
— Мин сүрүннээн Likee, Instagram, Youtube көрөбүн. Араас оонньууларга оонньуубун. Ол эрээри Интэриниэккэ күнү күннүктээн олорбоппун. Кыра бириэмэни аныыбын. Үксүгэр бэлисипиэт тэбэбин, мотигынан хатааһылыыбын, дьоммор көмөлөһөбүн, айылҕаҕа сылдьабын. Бэйэм саастыылаахтарбар төлөпүөҥҥэ наһаа олорботторугар баҕарабын. Биир чаастыылаахтарбын алыс интэриниэтинэн үлүһүйүмэҥ диэн ыҥырабын.