Оҕо успуорда аан дойдутааҕы успуорт сайдыытыгар улахан оруоллаах уонна аныгы технологиялары, инвестициялары, судаарыстыбаннай уорганнар өйөбүллэрин кытары быһаччы сибээстээх.
Бүгүн, от ыйын 4 күнүгэр, Арктикатааҕы судаарыстыбаннай агротехнологическай университекка ыытыллыбыт норуоттар икки ардыларынааҕы «Азия оҕолоруттан» университетскай успуорка» научнай кэмпириэнсийэ бастакы күнүн үөрүүлээх арыллыыта буолан ааста. Кэмпириэнсийэ икки бэлиэ тэрээһин иһинэн: VIII «Азия оҕолоро» норуоттар икки ардыларынааҕы спортивнай оонньуулар уонна Чурапчытааҕы cудаарыстыбаннай физическай култуура уонна успуорт университетын 25 сылын көрсө ыытыллар. Үөрүүлээх тэрээһин алгыһынан уонна оһуохайынан саҕаланна, кэлбит ыалдьыттарга саха норуотун сиэрин-туомун ыыттылар.
Икки күннээх тэрээһин маҥнайгы күнүн үлэтэ түөрт хайысханан бырайыактары билиһиннэриигэ олоҕурда. Оҕолор, устудьуоннар уонна маассабай успуорт сайдыытыгар туһуламмыт боппуруостар көрүлүннүлэр.
Уопсайа уон судаарыстыбаттан, уонтан тахса дойду эрэгийиэниттэн үрдүк салайааччылар, учуонайдар уонна эдэр исписийэлиистэр кыттыыны ыллылар. Кэмпириэнсийэ норуоттар икки ардыларынааҕы физическай култуура уонна успуорт университеттарын холбоһугун, Арассыыйа успуордун Министиэристибэтин, Саха сирин Бырабыыталастыбатын, «Азия оҕолоро» дирекциятын уонна араас министиэристибэлэр өйөбүллэрин иһинэн ыытыллар.
Кэмпириэнсийэ түмүгүнэн научнай үлэ хомуурунньуга тахсыаҕа, электроннай көрүҥэ РИНЦ саайтыгар баар буолуоҕа.
Иннокентий Готовцев, Чурапчытааҕы физическэй култуура уонна успуорт институтун ректора:
— Кэмпириэнсийэ ис хоһооно оҕолор уонна устудьуоннар успуортарыгар, араас дойду национальнай көрүҥнэрин сайдыытыгар уонна норуоттар икки ардыларынааҕы сыһыаҥҥа туһуланар. Уопсайынан маассабай спорт сайдыытыгар баар кыһалҕалар көтөҕүллүөхтэрэ. Ону таһынан кэмпириэнсийэ иһинэн быыстапка үлэлиир. Манна доруобай аһылыгы кэтээн көрөр, чинчийэр, медико-биологическай арыаллааһыны оҥорор, национальнай көрүҥнэрбитин хайысхалыыр киин куораттартан улахан тэрилтэлэр кыттыыны ылаллар. Бу кинилэр биһиги техническай сорудахпытынан оҥорбут тренажербытын көрдөрүөхтэрэ, быыстапкаҕа туруоруохтара уонна өрөспүүбүлүкэ оройуоннарыттан: Эбээн-Бытантайтан, Ньурбаттан уо.д.а, оҕо уһуйааннарын тэрилтэлэрэ кэлэн, бэйэлэрин практическай оҥоһуктарын көрдөрүөхтэрэ. Маны таһынан специализированнай спортивнай оскуолалар, учууталлар, тренердар кыттыыны ылыахтара. Сарсын Ил Түмэн улахан саалатыгар пленарнай мунньах буолуоҕа, манна резолюция ылыахпыт. Резолюция түмүгүн барытын биһиги учууталларбытыгар, тренердарбытыгар практика быһыытынан түҥэтиэхпит.
Сиһилии бу туһунан видеоҕа көрүҥ:
Матырыйаалы бэлэмнээтилэр Анжелина Жданова, Сайыына Тобонова, Алгыстаана Захарова, Антон Белолюбский, Авдей Неустроев, Николай Степанов, оҕо пресс-киинэ.
keskil14.ru