Сэтинньи 20 күнэ 1 №-дээх Оҕо ускуустубатын дьиэтигэр биир үөрүүлээх күн буолла. Л.А. Ким аатынан Оҕо художественнай оскуолатын 5 кылааһын үөрэнээччилэрин тус быыстапкалара тэрилиннэ. Оҕолор биэс сылы быһа уруһуйдуурга үөрэнэн, айар дьоҕурдарын сайыннаран бу күн араас тиэхиньикэнэн толоруллубут, бэйэ илиитинэн оҥоһуллубут үлэлэрин көрдөрдүлэр. Эдэр худуоһунньуктар салайааччыларынан талааннаах учуутал, профессиональнай уруһуйдьут Анна Дмитриевна Саввина буолар. Айар куттаах оҕолору эҕэрдэлии төрөппүттэр, оскуола иитиллээчччилэрэ муһуннулар.
Оҕолору олохторугар биир дьоһуннаах күннэринэн СӨ Култуураҕа уонна духуобунай сайдыыга миниистири солбуйааччы Мария Васильевна Турантаева эҕэрдэлээтэ:
Бу биэс сыл эһиэхэ олус кэрэхсэбиллээх кэминэн буолла. Бүгүн биһиги эһиги бастыҥ үлэлэргитин илэ харахпытынан көрөбүт. Эһигиттэн саҥа Осиповтар, Репиннэр, Суриковтар үүнэн-сайдан тахсыахтара, салгыы олохторун ыарахан эрээри, олус интэриэһинэй худуоһунньук суолун кытта сибээстиэхтэрэ диэн эрэнэбин.
Анна Дмитриевна маҥнайгы кылааһын уонна бүгүҥҥү быыстапка туһунан санаатын үллэһиннэ:
Бу мин бастакы кылааһым. Сыл ахсын оҕолор үчүгэй үлэлэрин методическай пуоҥҥа ылан, быыстапкабытыгар бэлэмнэммиппит. Үөрэнээччилэр араас тиэхиньикэни: академическай уруһуй, живопись, композиция, витраж, папье-маше, гиипсэни кутуу, туойунан үлэ, аппликация — барытын баһылаатылар. Биһиги сайын аайы, үөрэх дьыла бүтүүтэ, үөрэхпит бырагырааматынан куорат таһыгар аһаҕас халлаан анныгар уруһуйдуу тахсар этибит. Оттон быйыл анаан-минээн биһиэхэ оҥоһуллубут 10 күннээх экскурсиялаах «Международный плэнер: юные художники» диэн бырагырааманан Кытайга Байдайхэ оройуоҥҥа сырыттыбыт. Оҕолор Кытай истиэнэтиттэн саҕалаан аатырбыт кэрэхсэбиллээх сирдэригэр, кэрэ айылҕаларыгар, хайаларыгар сылдьан уруһуйдаатылар. Ону тэҥэ, 30 үөрэнээччим «Моя Якутия» диэн витраж үлэлэрин илдьэн, Лонг Аныгы ускуустуба түмэлигэр биир түһүлгэҕэ быыстапка тэрийбиппит. Кытай эдэр худуоһунньуктара оҕолор үлэлэрин сэргээн, маастар-кылаас ыыппыттара. Махталбытын биллэрэн, салгыы өссө да үлэлэһиэхпит диэн бэйэбит үс үлэбитин бэлэхтээбиппит. Миэхэ бэйэбэр бу Кытайга сырыыбыт улахан уопут буолла, элбэх саҥаны биллим-көрдүм. Үөрэнээччилэрбэр бу биэс сыл өйдөрүгэр-санааларыгар хаалыа, айар дьоҕурдара арыллыбыта кэнэҕэскитин да олохторугар туһалаах буолуо диэн эрэнэбин.
Станислава Иванова, 5 кылаас:
Мин оҕо эрдэхпиттэн уруһуйдуубун. Манна 2020 сыллаахха туттарсан үөрэнэ киирбитим. Байдайхэҕэ сылдьан, үксүгэр айылҕатын уруһуйдаабыппыт. Аатырбыт Кытай истиэнэтин көрөн үөрбүтүм. Хомойуох иһин, ардах түһэн, хаартыскаҕа түһэрэн уруһуйдаабыппыт. Үлэбин ордук харандааһынан, гуашь кырааскатынан толорорбун сөбүлүүбүн.
Кыдаана Турантаева, 5 кылаас.
Бу быыстапкаҕа араас тиэмэҕэ уруһуйдаабыт үлэлэрбит тураллар. Ол курдук, биир тиэмэбит идэлэргэ ананаллар. Мин төрөппүттэрим култуура үлэһиттэрэ буоланнар, бэйэм кыра эрдэхпиттэн тыйаатырга чугаспын. Ол иһин олоҥхо тыйаатырын уруһуйдаабытым.
Эдэр худуоһунньуктар хас биирдии уруһуйдара атын-атын тыыннаах буолан, ыалдьыттар биһирэбиллэрин ыллылар. Оскуола атын да хайысхалаах үөрэнээччилэрэ сөҕө-махтайа көрдүлэр.
keskil14.ru