Ахсынньы 17-21 күннэригэр дойдубут тэбэр сүрэҕэр Москва куоракка аан маҥнайгытын ыытыллар Оҕо уонна ыччат Арассыыйатааҕы хамсааһынын маҥнайгы сийиэһигэр Саха сириттэн 13 дэлэгээт кыттыыны ылыаҕа. Талыллыбыт дэлэгээттэр оҕо холбоһуктарын уонна устудьуон этэрээтин актыбыыстара буолаллар. Барыта 6 улуустан уонна Дьокуускай куораттан саамай чаҕылхай, барыга-бары көхтөөх, бастыҥ оҕолор сүүмэрдэнэн талылыннылар.
Саҥа сүүрээн — Оҕо уонна ыччат Арассыыйатааҕы хамсааһына дойдубут бэрэсидьиэнэ Владимир Путин от ыйын 14 күнүнээҕи федеральнай сокуонугар олоҕуран тэриллэр. Дойду үрдүнэн барыта 85 оҕо уонна ыччат хамсааһынын эрэгийиэннээҕи салаалара тэриллэн үлэлиирэ былааннанар. Саха сирин делегацията аан бастакытын ыытыллар Оҕо уонна ыччат Арассыыйатааҕы хамсааһынын сийиэһигэр бэйэлэрин кэккэ этиилэрин киллэриэхтэрэ.
Үөһээ Дьааҥы уола, Марк Жирков аатынан Дьокуускайдааҕы музыкальнай колледж 2 куурсун устудьуона Юра Слепцов алын кылаастан оҕо хамсааһынын биир сүрүн актыбыыһа.
Кини Михаил Лаврентьевич Новгородов аатынан ааттаммыт Верхоянскай орто оскуолатыгар тохсус кылааска үөрэнэ сылдьан , “И.С.К.Р.А” (Интеллектуальные, Смелые, Креативные, Решительные, Активисты) оҕо хамсааһынын бэрэссэдээтэлинэн уонна оскуола бэрэсидьиэнинэн талыллан үрдүк көрдөрүүлээхтик үлэлээн кэллэ. Онтон устудьуоннуур кэмигэр олоххо көхтөөх актыбыыстар кэккэлэрин хаҥатан, маҥнайгы куурустан устудьуоннар этэрээттэригэр киирбитэ, билигин Юра “Infinity” устудьуоннар педагогическай этэрээтин хамандыыра. Кини этэринэн, оҕо кыра эрдэҕиттэн үөрэххэ, уопсастыбаннай олоххо көхтөөх буоллаҕына, олоҕор элбэҕи ситиһэр.
М.Е. Николаев аатынан Өктөмнөөҕү лицей 10 кылааһын үөрэнээччитэ Карина Строева 8 кылаастан Арассыыйатааҕы үөрэнээччилэр хамсааһыннарын эрэгийиэннээҕи салаатын чилиэнэ. Аан маҥнайгытын ыытыллар Оҕо уонна ыччат хамсааһынын дэлэгээтинэн талыллан үөрүүтэ улахан. Кини сийиэскэ кыттар хайысхата атын омук дойдутун оҕолорун кытары доҕордуу сибээһи олохтооһуҥҥа олоҕурар.
Саха сирин аатыттан Оҕо уонна ыччат Арассыыйатааҕы хамсааһынын маҥнайгы сийиэһигэр оҕо холбоһуктарын «Большая перемена», «РДШ», «Юнармия», орто үөрэх устудьуоннарын этэрээтин, «Вымпел» ВПЦ актыыбыс чилиэннэрэ: Мииринэйдээҕи политехническэй лиссиэй 10 кыл. үөрэнээччитэ Юлия Антонова, Жатай 1-гы нүөмэрдээх орто оскуолатын 9 кыл. үөрэнээччитэ Марина Будник, Дьокуускай куорат Д.Г. Новопашин аатынан 10 №-дээх орто оскуолатын 9 кыл. үөрэнээччитэ Данил Котов, Дьокуускай куорат 31 №-дээх орто оскуолатын 10 кыл. үөрэнээччитэ Моника Лугинова, Кэбээйи улууһун Сангаар орто оскуолатын 10 кыл. үөрэнээччитэ Анна Медведева, Дьокуускай куорат М.И. Кершенгольц аатынан 9 №-дээх орто оскуолатын 11 кыл. үөрэнээччитэ София Палавкова, М.Н. Жирков аатынан Дьокуускайдааҕы музыкальнай колледж 2 куурсун устудьуона Юрий Слепцов, И.Г. Тимофеев аатынан Майатааҕы лиссиэй 10 кыл. үөрэнээччитэ Евдокия Соловьева, М.Е. Николаев аатынан Өктөмнөөҕү лицей 10 кылааһын үөрэнээччитэ Карина Строева, Нерюнгри оройуонун 15 №-дээх орто оскуолатыттан Валерия Стрункина, Дьокуускай куорат В.И. Кузьмин аатынан 30 №-дээх орто оскуолатын 9 кыл. үөрэнээччитэ Полина Шестоперова, Мииринэй оройуонун 4 №-дээх орто оскуолатын 9 кыл. үөрэнээччитэ Мирослав Новичихин, Үөһээ Бүлүү оройуонун Тамалакаан орто оскуолатын 5 кылааһын үөрэнээччитэ Мира Багрынова кыттыыны ылыахтара. Кинилэр — дойдубут оҕолорун уонна ыччатын сомоҕолуур сүдү суолталаах тэрээһинин аан маҥнайгы хараҥаччылара буолаллар.
Бу күннэргэ дэлэгээттэр “Бэс чагда” оҕо лааҕырын сынньанааччыларыгар сийиэс үлэтин хаамыытын хайысхатынан стратегическай сессия ыытан, оҕолор санааларын, тустаах этиилэри иһиттилэр, үлэҕэ ыллылар.
Ол туһунан сиһилии видеоҕа көрүҥ:
keskil14.ru