Саха АССР тэриллибитэ 100 сыла туолбутунан уонна үбүлүөйдээх сыл Ийэ сылынан биллэриллибитинэн, Арыылаах агрохайысхалаах орто оскуолатын үөрэнээччилэрэ төрөппүттэрин уонна учууталларын кытта «Саха АССР 100 сылын үөрэнээччилэрэ» диэн бырайыагынан тикпит паннолара 2021 — 2022 үөрэх дьыла бүтүүтүн көрсө бэлэм буолла.
Панноҕа бу үөрэх сылыгар үөрэммит 70 оҕо аата араас өҥнөөх таҥас лоскуйугар быысапканан тиһиллэн киирдэ.
Панно эскиһин анал хамыыһыйа талыллан, өҥ-дьүһүн өттүн олус табыгастаахтык таҥан оҥордо. Ол курдук, бу хамаандаҕа оскуола иискэ дьоҕурдаах үлэһиттэрэ: Лариса Степановна Горохова, Алевтина Дмитриевна Юмшанова, Татьяна Александровна Павлова, Светлана Ивановна Бурцева, технология уонна уруһуй учуутала Елена Васильевна Мигалкина салалтатынан үлэни кэмигэр бүтэрдилэр.
«Оҕо — төрөппүт — оскуола — бары бииргэ!» хайысханы тутуһар өр кэмнээх сыралаах үлэбит биир айар үлэтэ күн сирин көрдө. Үйэлээх өйдөбүнньүк буолар панно ( 3,0 м — 2,5м ) оскуола норуот олорон ааспыт олоҕун — дьаһаҕын кэпсиир, көрдөрөр түмэлин истиэнэтигэр ыйанан, кэрэ бэлэх буолан кэрэһэлии туруо. Үөрэнээччилэрбит эһэлэрин — эбэлэрин олорбут олохторун ытыктаан, хас биирдиилэрэ ааттарын тиһэн «Саха АССР 100 сылын үөрэнээччилэрэ» диэн панноҕа биир санаанан аат иҥэрдилэр.
Розалия Слепцова,
Арыылаах,
Дьааҥы