Алтынньы 11 күнүгэр биһиги нэһилиэкпитигэр И.А. Солдатов аатынан спортивнай саалаҕа оскуола ону тэҥэ «Чуоранчык» оҕо саадын уолаттарыгар хапсаҕай күрэҕэ буолан ааста.
«Чуораанчык» оҕо саадыттан 5 бөҕөс кыттыыны ылла. Кинилэртэн кыра сүһүөххэ бастакы миэстэни Саша Сысолятин, иккис миэстэни Миша Неустроев ыллылар. Орто сүһүөххэ Герман Ларионов бастаата, иккис – Костя Стручков, үһүс – Дуолан Болтунов буоллулар.
Онтон оскуола уолаттарыгар кыра ыйааһыҥҥа Даниэль Петров чемпионнаата. Сайнар Левин иккис, Ян Васильев үһүс буоллулар. 30 кг: 1 миэстэ – Алёша Захаров, 2 миэстэ – Алик Ноговицын, 3 миэстэ – Иванов Дьулусхан. 35 кг: 1 миэстэ – Эрхан Захаров, 2 миэстэ – Ильяр Солдатов. 40 кг: 1 миэстэ – Дамир Солдатов; 2 миэстэ – Матвей Тимофеев; 3 миэстэ – Айтал Ларионов. 55 кг: 1 миэстэ – Алёша Платонов; 2 миэстэ – Дима Захаров. 55 кг. үөһээ ыйааһыҥҥа: 1 миэстэ – Саян Левин, 2 миэстэ – Маркел Васильев. 50 кг. Сеня Васильев чемпионнаата.
Биһиги нэһилиэкпитигэр тустуу секцията Аркадий Николаевич Тастыгин салалтатынан үлэлиир. Кини – Саха өрөспүүбүлүкэтин үтүөлээх тренерэ. Мин Аркадий Николаевичтан үлэтин, инники былааннарын туһунан ыйыталастым.
– Эмис нэһилиэгэр үлэлээбитим иккис сыла буолан эрэр. Оскуолаттан 12 оҕону дьарыктыыбын детсадтан – 11 оҕону. Оҕолор былырыыҥҥытааҕар лаппа эбиллиннилэр диэн көрөбүн. Быйыл үөрэх дьылын саҕаланыыта «Открытие сезона» күрэххэ улууска икки уол Даниэль Петров уонна Сайнар Левин чемпионнаабыттара. «Боотурдар оонньуулара» өрөспүүбүлүкэ түһүлгэтигэр Даниэль Петров, Сеня Васильев бэһис миэстэ буолбуттара. Сыллааҕы үлэни ырытан көрдөхпүнэ, оҕолор кыахтара, тусталлара эбиллибит, кыайыыга дьулуурдара күүһүрдэ. Былырыын уопсайа 6 күрэххэ кыттыбыппыт. Ол тэтиммитин быйыл ыһыктыбакка үлэлиэхпит.
Билигин Амурскай уобаласка Белогорскай куоракка ыытыллар ССРС спордун маастара Расим Юлдашев кэриэһигэр ыытыллар турнига кыттарга бэлэмнэнэбит. Сэтинньи ыйга 9 уолу илдьэ барыам. Бу сыл аайы ыытыллар турнирга миэстэлэһэр сыаллаах-соруктаах кыттабыт. Оҕолор тустууларын өссө сайыннарыахтара диэн эрэллээхпин. Биир уолбут Айгылаан Николаев Н.С. Захаров-Сахаачча аатынан Амматааҕы оҕо спортивнай оскуолатыгар үөрэнэ киирдэ. Стёпа Степанов Чурапчыга спорт оскуолаҕа киирдэ.
Ситиһиллибитинэн тохтоон хаалбакка, уолаттарбын кытта өссө үлэлиэхпит. Кинилэр ситиһиилэрэ – нэһилиэк барытын ситиһиитэ, үөрүүтэ», – диэн тренер Аркадий Николаевич Тастыгин санаатын үллэһиннэ.
Салгыы эдэр бөҕөстөр Саян, Сайнар Левиннэр ийэлэрэ Тамара Александровна Левина спортивнай секциялар туһунан санаатын үллэстэригэр көрдөстүм.
– Ааспыт үөрэх дьылыттан нэһилиэкпитигэр тустууга Аркадий Николаевич Тастыгин, национальнай көрүҥнэргэ Александр Александрович Ларионов тренеринэн үлэлэрин саҕалаабыттара олус үчүгэй. Уолаттар эт-хаан, өй-санаа, бэрээдэк өттүнэн күүскэ сайыннылар. Соҕотох ийэ буолан, уол оҕону сайыннарыыга билбэтим да, сатаабатым да элбэх. Ол да буоллар уолаттарым физкультура эрэ уруогунан муҥурданаллара кинилэр сайдыыларыгар туох эрэ тиийбэт диэн син сэрэйэн көрөр курдугум. Улахан уол Саян былырыын саас «Чыпчаал» кулууп тренерин Александр Александровыһы кытта Владивосток куоракка бара сылдьыбыта. Ыраах айаҥҥа сылдьан, сири-дойдуну көрөн, үөрэн-көтөн аҕай кэлбитэ. Бу саас Аркадий Николаевич Тастыгин Тындаҕа оҕолору күрэхтэһиннэрэ илдьэ сылдьыбытыгар кыра уолбун Сайнары арыый кыра диэммин ыыппатаҕым. Быйыл сэтинньи ыйга Белогорскайга барыахтаах. Уолаттарым тустууга кыралаан ситиһиилээхтэр, 2-3 миэстэлэри ылаллар.
Уол оҕо айылҕаҕа, спортка хайаан да сыстыахтаах. «Чыпчаал» спортивнай кулуупка сылдьар уолттарбытыгар биллэр-көстөр спортсменнар кэлэн маастар-кылаас ыыталлара олус туһалаах, уолаттарбыт биллэ тупса түстүлэр. Элбэх күрэхтэргэ айанныыллар. Халтайга буолбакка, кыайыы мэтээллээх кэлэллэрэ төрөппүккэ, оҕоҕо, тренергэ олус үөрүүлээх. Онон биһиэхэ Аркадий Николаевич Тастыгин, Александр Александрович Ларионов тренердээн саҕалаабыттарыттан үөрэбит. Кинилэргэ элбэх ситиһиилэри, кыайыыны-хотууну баҕарабыт уонна махтанабыт», – диэн икки уол ийэтэ, Эмис нэһилиэгин олохтооҕо Тамара Александровна Левина санаатын үллэһиннэ.
Ити курдук Эмиспит нэһилиэгэр И.А. Солдатов аатын сүгэр спортивнай саалабытыгар түмсүү, үтүө санаалаах тренердэр үлэлииллэрин тухары саха тустуута, саха төрүт оонньуулара умнуллуохтара, сүтүөхтэрэ суоҕа диэн эрэнэбин.
Эрчим НИКОЛАЕВ, IX кылаас,
В.М. Новиков-Күннүк Уурастыырап аатынан Эмис орто оскуолата, Амма
Ааптар хаартыскалара