Булуҥ улууһун Бороҕон нэһилиэгин уолаттара сылын аайы учууталларын кытта айылҕаҕа бултаан, сынньанан, булт араас сатабылларыгар үөрэнэн киирэллэр. Хоту дойду хоһуун уолаттара айылҕаҕа сылдьалларан олус астыналлар, оннооҕор дьиэлээри уйадыйан да ылар кэмнэрэ баар. Ол туһунан уонна уолаттар тус санааларын истиэҕиҥ:
Кэлэрбэр уйадыйан ыллым…
Биһиги сарсыарда 11 чаастан айаннаабыппыт. Кырса сиһин ыттан тоҥмутум, үс ааһыыта тиийиэхтээх сирбитигэр тиийбиппит.Тиийэн баран начаас хомунан, хаар күрдьүбүппүт, мас кыстаан дьиэҕэ кииллэрэн оһох оттубуппут.Киэһээ илим үтэ барбыппыт. Учууталбыт Василий Васильевич бурана алдьанан хойут соҕус кэлбитэ.Дьиэбит баанньык курдук буолбута.Күн аайы илим үтэ барар этибит уонна муус аннынан балык.Ити курдук сэттэ хонукпут биир күн курдук түргэн баҕайытык ааста.Кэлэр күммүтүгэр уйадыйан ытыы сыстым…
Никитин Герман, X кылаас.
Ураһа Тирэҕэр утуйар олус да үчүгэй!
Мин бастакы сынньалаҥым олус үчүгэйдик, туһалаахтык ааста. Оскуола уолаттара буолан, чуолаан 7-11 кылаастар уонна учуутталларбыт Стручков Андрей Андреевич, Горохов Василий Васильевчи иилээн илдьэ сырыттылар. Бураммыт уопсайа түөрт этэ. Ураһа Тирэҕэр тиийэн баран дьиэ таһынааҕы хаары ыраастаан, мас кииллэрэн, хайытан, уу баһан баран, ас буһарыммыппыт.Уолаттары кытта уочаратынан ас астыырбыт, иһит сууйарбыт.Сарсыҥҥытыгар илим үтүнэн, күөгүлээн күммүтүн билбэккэ хаалбыппыт.Күннэрбит түргэттэрин, балыктаан, сибиэһэй салгыҥҥа сылдьар тоҕо үчүгэйэй!
Ураһа Тирэҕэр утуйар олус да үчүгэй, сынньанан тураҕын.Мин өссө да , хайаан да барыаҕым!
Стручков Алгыстаан, IX кылаас
Туһалаах сынньалаҥ
Барбыт сирбит аата Ураһа Тирэҕэ диэн. Сарсыарда уонна киэһээ илим көрө барааччыбыт. Онтон күнүс илин диэки балыктыы барааччыбыт. Икки ас асчыттар хаалаллар, сорохтор балыктыы барааччылар.Кэлэн баран тото-хана аһаан баран күннээҕини кэпсэтэрбит, оонньуурбут.Сарсыарда туран,хомунан баран балыкпытын аахпыппыт. Уопсайа 371 балык этэ. Үллэстии буолбута.Оскуолаҕа 40 киилэни биэрбиппит сороҕун дьоннорбутугар.Бу сиргэ өссө да кэлиэм турдаҕа, каникулбут аҕыйах да күннээх буоллар туһалаахтык ааста.
Никита Соловьев
Оҕо сааспыт кэрэ кэмнэрэ — айылҕаҕа
Күһүҥҥү каникул саҕана мин стадаҕа ахсааҥҥа тахсыбытым.Онно икки күн аахпыппыт, ол бириэмэҕэ каникул саҕаламмыта.Уолаттар балыкка барбыттар этэ. Ахсаан бүппүтүн кэннэ бүһүөлэккэ кэлбиппит. Онтон сарсыҥҥытыгар Ураһа Тирэҕэр айаннаабытым.Онно тиийбитим уолаттар түөрт илим үппүттэр этэ, киэһээ баран көрбүппүт сөрүү диэн балык элбэх этэ.Сарсыныгар өссө икки илим үппүппүт.Күөгүгэ аҕыйах хабар этэ. Уолаттар үс сменаҕа арахсыбыттара .Дежурнайдар дьиэҕэ хаалан ас астыыллар, мас кыстыыллар, уу баһаллар, иһит хомуйаллар.Биһиги, 11 кылаас уолаттара, дежурнайдаабатахпыт, сынньанар сылбыт этэ. Киэһэлик станция генератор холбуубут, ол бириэмэҕэ тугу баҕар гынаҕын, үксүгэр балык лапчаанын ыраастыыбыт, оччоҕуна куулга элбэх батар уонна куулу алдьаппат.Киэһээҥҥи аһы аһаан баран илим көрө барабыт, кэлэн утуйабыт. Барар күммүт кэлбитэ. Балыкпытын аахпыппыт: уопсайа 371 балык онтон: быйыт-100, дьарҕаа-136, сөрүү- 135, сыҥааҥ-7, сордоҥ-3.
Иннэ гынан былырыыҥҥы көрдөрүү быйылгы көрдөрүүтээҕэр аҕыйах эбит. Биир куулу оскуолабытыгар биэрбиппит сороҕун үллэстибиппит. Өйдүү-саныы сылдьар гына хаартыскаҕа түспүппүт. Дьиэттэн тахсан баран, бураан собуоттанан баран хамсаабыппытыгар хараҕым уута кэлбитэ.
Стручков Андрей, XI кылаас.
Бириэмэ бытаар
Биһиги ыраах сиргэ барбыппыт. Сэттэ уолаттар аан маҥнайгыларын барбыттара.Тиийэн баран санаам дэлби көтөҕүллүбүтэ. Онтон сарсыҥҥытыгар балыктаан-илимнээн киирбиппит. Уопсайа биир нэдиэлэ сыппыппыт онтон бииргэ үөрэнэр, чугас доҕорум стадаттан хойутаан кэлбитэ. Күөгү айас мөлтөх этэ, улахан аҥаарын балыкпытын илимтэн ылбыппыт.Мин ол быыһыгар түөрт балык эрэ хаптардым.
Хас сылын аайы инник балыктыы барарбытын олус диэн сөбүлүүбүн. Онтон быйыл бүтэһик сырыыбыт, тоҕо диэтэр быйыл оскуоланы бүтэрэр сылбыт. Ол санааттан төннөргө олус ыарахан этэ. Сыл аайы инник өссө сылдьыахпыт диэн санаалаах курдук этим.Бириэмэни төптөрү эргитэр кыахпыт суох, ол иһин хайыахпытый. Улаатан баран сылдьыахпыт буоллаҕа. Үчүгэй да кэмнэр аастылар.
Старостин Ринат, 11 кылаас