«Иэйиэхсит» оҕо бөлөҕө 2014-2022 сс. «Тугутчаан » оҕо сайдар киинин кытта «Ситим» бырайыагынан үлэлиир. Бырайыак научнай төрдө психологическай наука доктора, профессор Анастасия Петровна Оконешникова 1992 сыллаахха таһааттарбыт «Эркээйи» бырагырааматыгар олоҕурар. Сыала — оскуолаҕа киирэр оҕо бэлэмнээх буоларын ситиһии.
Саас сааһынан сылларынан кылгастык аттардахха маннык.
2014-15 сс. олохтоох библиотеканы кытта сибээһи тутуһан, уһуйаан оҕото кэпсиир дьоҕурун сайыннарыы.
2015-16 сс. «Ыал тыйаатырын» тэрийэн төрөппүт уһуйааны кытта биир санаанан үлэлээн оҕону оскуолаҕа бэлэмнээһин.
2016-17 сс. «Уһуйаан-түөлбэ» хайысхатынан үлэ барбыта. Оҕолор олорор түөлбэлэрин иитээччилэр, төрөппүттэр, иэйиэхситтэр көмөлөрүнэн доклад суруйан көмүскээбиттэрэ.
2017-18 сс. «Тымтык» саас—»Чөмчүүк» сааска диэн бөлөх оҕолоро уһуйаан оҕолоругар уруок, тэрээһин, куруһуок ыыппыттара.
2018-19 сс. «Тымтык» саас—»Чөмчүүк» салгыы үлэтин салҕаабыта.
2019-20 сс. куйаар ситиминэн «Эйиэхэ — сиэммэр» диэн хос бырайыагынан үлэ барбыта. Манна уһуйаан иитиллээччилэрин эбэлэрэ, эһэлэрэ үлэлии сылдьар үлэлэрин уонна дьиэҕэ олорор эбээлэр, эһээлэр тус дьарыктарын, сүбэлэрин оҕолорго видеоҕа устан ыыппыттарын көрөн, үөрэн-көтөн, киэн туттуу кэмин аһарбыттара умнуллубат.
2020-21 сс. куйаар ситиминэн «Халандаар бэлиэ күнэ» диэн ааттаан бөлөх оҕолоро хас нэдиэлэ ахсын уһуйаан былааныгар сөп түбэһиннэрэн оҕолор видеоҕа уһуллан ыыппыттарын көрөн уһуйаан оҕолоро халандаар бэлиэ күннэрэ туох суолталаахтарын билбиттэрэ.
2021-22 сс. «Иэйиэхсит» оҕо бөлөҕүн алын кылааһын оҕолоро «Доҕордуулар» куукула тыйаатырдара норуот остуоруйалара оҕону иитэр-үөрэтэр өттүн таба көрөн ол тула кэпсэтиилэрин олохтообута.
Аҕыс сыл бииргэ «Ситим» бырайыак олоххо киирэригэр тэбис-тэҥҥэ үлэлэспит иитээччилэргэ В.В. Даниловаҕа, А.Е. Фёдороваҕа, С.Т. Дордосоваҕа махталбыт улахан. Уһуйаан сэбиэдиссэйинэн 30 сыл үлэлээбит, Саха Өрөспүүбүлүкэтин үөрэҕин систиэмэтин туйгунун уонна ахсынньы ый 17 күнүгэр Россия үөрэҕэриитин систиэмэтин туйгуна үрдүк бэлиэни ылбытынан Лена Владимировна Дордосованы ис сүрэхпититтэн эҕэрдэлиибит! Инникитин да «Иэйиэхсит» оҕо бөлөҕүн үлэтин өйүөхтэрэ, бииргэ үлэлэһиэхтэрэ диэн баҕа санаалаахпыт.
«Тымтык»-«Иэйиэхсит» оҕо бөлөҕүн салайааччыта Н.Н. Михайлова, Ороһу нэһ.